ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Մանկավարժական համալսարանի 11 ուսանող «Ամառային դպրոց 2016» ծրագրի շրջանակներում ուղևորվեց Բելառուս, որտեղ նրանց հյուրընկալեցին Բելառուսի մանկավարժական համալսարանի ներկայացուցիչները:

Տարբեր ազգեր միավորած ծրագրի ընթացքում մասնակիցներն այցելեցին երկրի պատմամշակութային վայրեր, թանգարաններ, ծանոթացան նրանց պատմությանը, ազգային ավանդույթերին:

Աբովյանականները մասնակցեցին նաև մեծ շուքով նշվող բելառուսական ազգային տոներին՝ «Իվան Կուպալա»-ին և «День вышиванки»-ին: ՀՊՄՀ-ի ուսանողները հենց միջոցառման ընթացքում ներկայացրին Կոմիտասի ստեղծագործություններից, ինչի շնորհիվ գրավեցին բելառուսական ԶԼՄ-ների ուշադրությունը. երկու օր շարունակ մամուլն իր հրապարակումներում ուսանողներին ներկայացրեց իբրև Բելառուսի կրթությանն ու մշակույթին ծանոթանալու  նպատակով երկիր ժամանած հայ զբոսաշրջիկների:

Տեղի ամենաակտիվ ճամբարներից «Սպուտնիկ» կազմակերպված այցը համընկավ հայերի Վարդավառի օրվա հետ և հայ ուսանողներն այդ տոնը տեղափոխեցին Բելառուս. տարբեր ազգերի ներկայացուցիչներ այդ տոնը նշեցին ինչպես հայերը:

Ծրագրի հերթական հագեցած օրը մասնակիցներն  այցելեցին «Միր» և «Նեսվիժ» դղյակներ՝ Բելառուսի ամենաերևելի և տեսարժան վայրերը, որտեղ ծանոթացան հին կայսրերի ապրելակերպին և թե ինչպես են նրանք իրենց շքեղ դղյակներում պատրաստվել բոլոր պատերազմներին:

Բացի զբոսանքից, ուսանողներն անցկացրել են նաև սպորտային խաղերով հագեցած ժամանակ, Բելառուսի մանկավարժական համալսարանի կիրառական բաժնի դասախոսների օգնությամբ պատրաստել ազգային տիկնիկներ: Այցի ընթացքում կազմակերպվեց նաև հանդիպում տեղի հայերի հետ՝ օրն անցկացնելով հայկական երգ ու պարով:

Ծրագրի շրջանակներում ուսանողները ներկա եղան նաև Բելառուսի  Մանկավարժական համալսարանում մագիստրատուրայի համակարգին և պատմությանը նվիրված դասախոսությանը, այցելել Բելառուսի ազգային գրադարան:

Բելառուսյան ծրագրի հանդիսավոր փակման ժամանակ մասնակիցները ներկայացրին իրենց համալսարանը, երկիրը, ազգային երգերն ու պարերը, փոխանակվեցին նվերներով, ստացան պատվոգրեր և հրաժեշտ տալով միմյանց՝ խոստացան աննախադեպ ծրագրի շրջանակներում կրկին հանդիպել: