ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Օրերս Սկզբնական կրթության ֆակուլտետի ուսանողներն ու պրոֆեսորադասախոսական կազմը  կամավորական գործունեության շրջանակներում Ամանորին ընդառաջ այցեր  իրականացրին հատուկ դպրոցներ:

Նրանք եղան նախ Նուբարաշենի համար 11 մտավոր թերզարգացում ունեցող երեխաների հատուկ դպրոցում, որտեղ խաղալիքներ նվիրեցին երեխաներին, իսկ ծնողներին՝ անհրաժեշտ պարագաներ և հագուստ:

1-ին կուրսի ուսանողները դպրոցում բեմականացրին «Չարի վերջը» հեքիաթը, ապա երգ ու պարով ամանորյա տրամադրություն ու շունչ հաղորդեցին երեխաներին:

Կամավորների հաջորդ կանգառը Շենգավիթ վարչական շրջանի Ջամբազյանի անվան համար 79 ներառական դպրոցն էր, ուր միջոցառմամբ հյուրերին դիմավորեցին աշակերտները: Այս դպրոցում ևս հանդիպումն ավարտվեց ամանորյա փոխադարձ շնորհավորանքներով, երգ ու պարով:

Ապագա մանկավարժների կամավորական նախամանորյա այցն ավարտվեց Նոր Նորք վարչական շրջանի 2-րդ զանգվածում բնակվող անապահով ընտանիքներ այցելությամբ. ուսանողների նախաձեռնությամբ ընտանիքներին տրված սնունդը, հագուստը, խաղալիքներն ու գրենական պիտույքներն իսկական նվեր էին նրանց համար:

Սկզբնական կրթության ֆակուլտետի կամավորների խոսքով՝ բարեգործական այցերը լինելու են շարունակական, ինչին կարող են միանալ բոլոր ցանկացողները: