- Հայ
- Рус
- Eng
Վերջերս Մոսկվայում կայացավ Ժամանակակից դիզայնի երրորդ միջազգային ցուցահանդեսը, որը կազմակերպվել էր Ռուսաստանյան գեղարվեստի ակադեմիայի, Դիզայներների միության միջազգային ասոցիացիայի և Ռուսաստանի նկարիչների միության հովանու ներքո:
Ցուցահանդեսին մասնակցում էր նաև Մանկավարժական համալսարանի Կերպարվեստի ամբիոնի պրոֆեսոր Արտաշես Քեշիշյանը՝ «Մեր արմատները» հարթապատկերային աշխատանքով:
Պատկերահանդեսում արվեստասեր հասարակությունը ծանոթացավ տարբեր երկրների ստեղծագործողների գործերին՝ գեղանկար, գրաֆիկա, քանդակ, դիզայն:
Խստապահանջ հանձնաժողովը՝ Ռուսաստանի գեղարվեստի ակադեմիայի նախագահ Զուրաբ Ծերեթելին, Դիզայներների միության միջազգային ասոցացիայի նախագահ Անդրեյ Բոբիկինը, Ռուսաստանի նկարիչների միության նախագահ Կոնստանտին Խուդյակովը բարձր գնահատեցին Արտաշես Քեշիշյանի աշխատանքը՝ նրան շնորհելով դափնեկրի կոչում:
Ի դեպ, ՀՊՄՀ-ի պրոֆեսորի «Մեր արմատները» հարթաքանդակում պատկերված են հեղինակի պապն ու տատը, երիտասարդ հայրն ու տիկնիկը ձեռքին աղջնակը: Նրանք եկեղեցու ներսում են, իսկ պատուհանից ներթափանցող արևի ճառագայթները լուսավորում են Հայոց կոտորածից նահատակված արվեստագետի նախնիներին:
Դասական արվեստի սկզբունքով կատարված հարթաքանդակն իր գեղագիտական բարձր մակարդակով կրկին աշխարհին հիշեցրեց 20-րդ դարի 1-ին ոճրագործությունը:
