ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Հունիսի 7-9-ը Erasmus+ BOOST /Հայաստանյան համալսարանների միջազգայնացման ռազմավարության և մարքետինգի խթանում/ ծրագրի շրջանակներում Շվեդիայի Թագավորական համալսարանում տեղի ունեցավ ուսումնաճանաչողական առաջին այցը:

Այցին մասնակցում էին 23 մասնակից, այդ թվում՝  Շվեդիայի, Իսպանիայի, Պորտուգալիայի, Էստոնիայի և Հայաստանի բարձրագույն ուսումնական հաստատություններից, ՀՀ կրթության և գիտության նախարարությունից,  ակադեմիական փոխճանաչման և շարժունության ազգային տեղեկատվական կենտրոնից:

Ծրագրի համակարգող բուհից՝ Մանկավարժական համալսարանից  այցին մասնակցում էին Աշխատակազմի և միջազգային համագործակցության հարցերով պրոռեկտոր Արա Երեմյանը և միջազգային համագործակցության բաժնի մասնագետ Գոհար Առաքելյանը:

Նպատակն էր ուսումնասիրել ծրագրի եվրոպացի գործընկերների կողմից ներկայացված միջազգայանցման փորձը և ռազմավարությունը, ինչպես նաև քննարկել և մշակել ծրագրի հետագա գործողությունները:

Եռօրյա հանդիպման ընթացքում ծրագրի հայաստանյան մասնակիցները ծանոթացան և ուսումնասիրեցին  ինչպես ծրագրի եվրոպացի գործընկերների, այնպես էլ  Շվեդիայի և այլ համալսարաններից հրավիրված պրոֆեսորների ներկայացրած բարձրագույն ուսումնական հաստատությունների միջազգային բաժինների կառուցվածքը, միջազգային առկա ծրագրերը, շարժունության ծրագերի իրականացման և միջազգայնացաման ընթացակարգը,  միջազգայնացման ռազմավարության մշակման գործընթացը:

Ծրագրի հայաստանյան գործընկերների կողմից ներկայացվեց ծրագրի նորաստեղծ կայքի  կառուցվածքը, բովանդակությունը, ինչպես նաև Erasmus+ HARMONY ծրագրի մասնակիցների կողմից ՀՀ բուհերի միջազգայանացման ուսումնասիրման նպատակով մշակված գործիքակազմն ու իրականացրած հետազոտության արդյունքները: 

Մասնակիցներն այցելեցին նաև  Շվեդական ինստիտուտ, ծանոթացան  գործող ծրագրերին, համագործակցության շրջանակներին, իրականացվող միջոցառումներին, փոխանակման և զարգացման ծրագրերին, ինչպես նաև  դրամաշնորհներին:

Ուսումնաճանաչողական այցն ամփոփվեց կլոր սեղանի շուրջ.մասնակիցները քննարկեցին հանդիպման արդյունքները և պլանավորեցին մոտ ապագայում ակնկալվող գործողությունների կատարումը: