- Հայ
- Рус
- Eng
Այսօր ավարտական դիպլոմներ ստացան նաև Մանկավարժական համալսարանի Օտար լեզուների ֆակուլտետի շրջանավարտները։
Ֆակուլտետն այս տարի ունի 79 շրջանավարտ երեք մասնագիտությունների գծով՝ Անգլերեն լեզու և գրականություն, Գերմաներեն լեզու և գրականություն, Ռուսաց լեզու և գրականություն։ Ապագա մանկավարժներից 17-ը ստացավ գերազանցության վկայական։
Շրջանավարտներին շնորհավորեցին ամբիոնների վարիչները՝ մաղթելով մասնագիտական հաջողություններ և ձեռքբերումներ։
Օտար լեզուների ֆակուլտետի դեկան Տիգրան Միքայելյանը միանալով օրվա մաղթանքներին՝ հույս հայտնեց, որ ի դեմս շրջանավարտների՝ մեր երկիրը կունենա լավագույն ուսուցիչներին, տարբեր ոլորտների առաջատար մասնագետների։ Նա խորհրդանշական համարեց զոհված աբովյանականների հիշատակը հավերժացնող հուշաքարի մոտ դիպլոմներ ստանալը․ դա կրկնակի պարտավորեցնող է երկիրը կրթությամբ զարգացնելու համար։
«Դուք կարող ուժ եք մեր երկրի, կրթական համակարգի զարգացման գործում։ Վստահ եմ, որ կկարողանաք Ձեր կարողություններով հարստացնել այստեղ ձեռք բերած գիտելիքները, մեր հաջողությունները հարստացնելով նոր բաղադրիչով և բովանդակությամբ»,-նշեց Տիգրան Միքայելյանն ու բարի երթ մաղթեց շրջանավարտներին։
Շրջանավարտները շնորհակալություն հայտնեցին հիշարժան և բովանդակալի ուսումնառության համար, իսկ նրանցից շատերը խոստովանեցին՝ շարունակելու են բարձրագույն կրթությունը ստանալ հարազատ կրթօջախում։
