- Հայ
- Рус
- Eng
Մանկավարժական համալսարանի ռեկտոր Ռուբեն Միրզախանյանը հավաստագրեր հանձնեց Հայոց պատմության և Համաշխարհային պատմության և դրա դասավանդման մեթոդիկաների ամբիոնի վերապատրաստված դասախոսներին:
Ակադեմիական 36 ժամ տևողությամբ վերապատրաստումների ընթացքում 20 դասախոս ուսումնասիրել է տեղեկատվական տեխնոլոգիաների, ուսուցման ժամանակակից մեթոդների, ինչպես նաև մասնագիտական դասընթացներ:
Պրոռեկտոր Սրբուհի Գևորգյանը վստահեցրեց, որ վերապատրաստումից հետո դասախոսները վերհանել են դասընթացի ուժեղ և թույլ կողմերը՝ հետագայում դրանք ավելի կատարելագործելու նպատակով:
«Վերապատրաստումներն անհրաժեշտություն են, ուստի մենք պատրաստ ենք լսել ձեր առաջարկներն ու դիտողությունները»,-նշեց ռեկտոր Ռուբեն Միրզախանյանն ու դասախոսների հետ քննարկեց հետագա անելիքները:
Ռեկտորը ևս մեկ անգամ կարևորեց բուհի միջազգայնացումը և դասախոսներին հորդորեց կատարելագործել օտար լեզուների վերաբերյալ գիտելիքները, կազմել օտարալեզու մեթոդիկաներ, ինչը հնարավորություն կտա ընդլայնել ուսանողների և դասախոսների փոխանակման ծրագրերը այլ համալսարանների հետ:
Եղան նաև առաջարկներ, մասնավորապես՝ կազմակերպել մասնագիտական գիտական ընթերցումներ, դասընթացները կազմակերպել մասնագիտական ավելի նեղ սեկցիաներով, ինչպես նաև թարգմանել և տպագրել պատմագիտության վերաբերյալ որոշ աշխատություններ: Ռեկտորը համաձայնեց նաև վերապատրաստվողների՝ վերապատրաստումներում այլ բուհերի մասնագետներ ընդգրկելու առաջարկը:
