ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

«Մեր փոխարեն խոսում են մեր աշխատանքները: Ուսանողներին հորդորում եմ՝ ստեղծագործելիս լինել ազնիվ և պահպանել գեղարվեստականությունը»,-նշեց ՀՊՄՀ օպերատորության և գեղարվեստական լուսանկարչության ամբիոնի դոցենտ, ՀՀ վաստակավոր գործիչ Սամվել Սևադան՝ այսօր կայացած «Իմ սեր, իմ Հայաստան» խորագրով ցուցադրության ժամանակ:

Ուսանողական լուսանկարչական աշխատանքների հիմքում ՄԱԿ-ի-2030 զարգացման օրակարգի կայուն զարգացման նպատակներն են, որոնց շուրջ էլ ստեղծագործել են ապագա լուսանկարիչները. գեղարվեստական լուսանկարչության բաժնի 2-րդ կուրսի 14 ուսանող ցուցադրության էր ներկայացրել շուրջ 60 լուսանկար, որոնք ընտրվել էին մի քանի հարյուր աշխատանքներից:

Կուրսի ղեկավար Սամվել Սևադայի կարծիքով՝ նման ձևաչափով ցուցադրվելը մեծ ոգևորություն է հաղորդում ուսանողներին. «Նրանց աշխատանքը գնահատում եմ գերազանց. մի քանի ամսվա կատարածը ամփոփվում է լուսանկարներում, որոնք հետագայում կցուցադրվեն նաև Հայաստանի մի շարք քաղաքներում, զորամասերում և այլուր»:

Սամվել Սևադան նկատում է՝ լուսանկարչությունն այսօր սիրված արվեստ է, և գեղարվեստական լուսանկարչությամբ զբաղվողներին հորդորում՝ սերտ կապի մեջ լինել Մանկավարժական համալսարանի համանուն ամբիոնի հետ, որն ամեն ինչ անում է լուսանկարչական արվեստը բարձր մակարդակով ներկայացնելու և պրոֆեսիոնալ լուսանկարիչներ պատրաստելու գործում:

Մանկավարժական համալսարանի ռեկտոր Ռուբեն Միրզախանյանը բարձր գնահատեց կատարված աշխատանքը և վստահեցրեց, որ ցուցադրությունն ունի կարևոր նշանակություն. «Սա աննախադեպ հնարավորություն է, որը նոր բովանդակություն է հաղորդում ուսումնական գործընթացին»,-նշեց ռեկտորն ու հավելեց, որ բուհում Սամվել Սևադայի գործունեությունը հպարտանալու առիթ է տալիս:

ՄԱԿ-ի հայաստանյան գրասենյակի մշտական համակարգող Շոմբի Շարփին կարևորեց Մանկավարժական համալսարանի հետ արդյունավետ համագործակցությունը և հույս հայտնեց, որ այն կլինի շարունակական:

«Ցուցահանդեսի թեման օրակարգի նպատակների շուրջ է, որը մեզ հուշում է, թե աշխարհի տարբեր երկրներն ավելի լավ ապագայի համար ինչպես պետք է առաջ գնան: Երբեմն ունենում ենք խնդիրներ և մարտահրավերներ, որոնց շուրջ չենք կարողանում գտնել լավագույն լուծումներ. մեզ անհրաժեշտ է երիտասարդների եռանդն ու ավյունը, հնարավորությունները, որոնցով հաղորդակցվում են ամենատարբեր համայնքների հետ»,-նշեց Շոմբի Շարփինը:

Նրա կարծիքով՝ յուրաքանչյուր լուսանկարում երևում են կայուն զարգացման նպատակների իրագործման ուղիները, ապագայի հանդեպ իրական մարտահրավերները. «Աշխատանքների շնորհիվ մենք ևս մեկ անգամ խորհում ենք կայուն զարգացման նպատակների մասին»,-հավելեց Շոմբի Շարփինը:

«Հայաստանում մշակույթի զարկերակը բաբախում է: Նկարներում կա հայրենիքի հանդեպ մեծ սեր, որը պետության կառուցման երաշխիք է, ինչպես նաև ճաշակ, ինչն էլ մանկավարժական աշխատանքի արդյունք է»,-նշեց գրող, հրապարակախոս Հակոբ Մովսեսն ու հավելեց, որ ՄԱԿ-ի հայաստանյան գրասենյակում հաճախ են կազմակերպվում միջոցառումներ, ինչը վկայում է՝ կազմակերպության կայուն զարգացման նպատակներում առկա է նաև ճաշակի գործոնը:
Հրապարակախոսի կարծիքով՝ ժողովուրդը կարող է լավ հասարակություն ու պետություն կառուցել, եթե դրանում գեղագիտական տարրեր մտցնի:

Հայկ Հովհաննիսյանն արդեն 2-րդ անգամ է մասնակցում ցուցահանդեսին, ոգևորված է, քանի որ ուսանողական տարիներին նման ցուցադրության մասնակցելն ավելի է ամրապնդում լուսանկարչության հանդեպ սերը:
«Լուսանկարչությունը կյանք է, որի միջոցով հնարավոր է զգացողությունները հաղորդել հազարավոր մարդկանց»,-վստահեցնում է Հայկ Հովհաննիսյանն ու խոստովանում, որ լուսանկարչությունն իր կյանքի լավագույն ձեռքբերումներից է:

Ելենա Խաչատրյանը ցուցադրության է ներկայացրել 5 աշխատանք, որոնցում գրքի, արժանապատիվ աշխատանքի հանդեպ սերն է ու աղքատությունը: Ապագա լուսանկարիչը վստահեցնում է՝ պրոֆեսիոնալների, ավագ կուրսընկերների կարծիքները շատ կարևոր են մասնագիտական կայացման ճանապարհին. «Լուսանկարչությունն ինձ համար սեր է, սիրելի մասնագիտություն»,-հավելեց ուսանողուհին:

Ուսանողները Մանկավարժական համալսարանի կողմից խրախուսվեցին դրամական պարգևներով: ՄԱԿ-ի հայաստանյան գրասենյակը ուսանողներին հանձնեց հավաստագրեր, իսկ Օպերատորության և գեղարվեստական լուսանկարչության ամբիոնի վարիչ Ռուբեն Երզինկյանին և դոցենտ Սամվել Սևադային՝ շնորհակալագրեր՝ ցուցադրության լավագույնս կազմակերպման համար: Նշենք, որ «Իմ սեր, իմ Հայաստան» խորագրով ցուցադրությունը կշարունակվի մինչև ապրիլի 13-ը: