ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Կայացավ ՀՊՄՀ երաժշտության մանկավարժության ամբիոնի դասախոս Արուսյակ Կոստանյանի՝ «Հայ կոմպոզիտորների երգերի դաշնամուրային փոխադրումներ՝ մեթոդական ցուցումներ» խորագրով աշխատության շնորհանդեսը։

Շնորհանդեսն ուղեկցվեց յուրատեսակ համերգով․ հնչեցին Շառլ Ազնավուրի, Տիրան ժորժ-Կառվարենցի, Աելքսեյ Հեքիմյանի, Արամ Սաթյանի, Արամ Ավագյանի, Արթուր Գրիգորյանի, Էդգար Հովհաննիսյանի և այլոց ստեղծագործությունները։ Հայտնի և սիրված ստեղծագործությունների վոկալ և գործիքային կատարումներով հանդես եկան Արուսյակ Կոստանյանը, Վազգեն Մինասյանը, Լիլի Խաչատրյանը, Արմինե Օջախյանը, Տիգրան Ալավերդյանը, Մարիաննա Ավետիսյանը և այլք։

«Հայ կոմպոզիտորների երգերի դաշնամուրային փոխադրումներ՝ մեթոդական ցուցումներ» աշխատությունը ներառում է հայ կոմպոզիտորների և երգահանների ճանաչված, առավել սիրելի երգերի դաշնամուրային փոխադրումները, որոնք ներկայացված են որպես մանրանվագներ։ Փոխադրումները նախատեսված են բարձրագույն երաժշտական հաստատությունների, քոլեջների, երաժշտական դպրոցների, ինչպես նաև կատարողական հնարավորություններ ունեցող դաշնակահարների և երաժշտասեր հանրության համար։ Դրանցից մի քանիսն ունեն տարբերակներ՝ բարդ, միջին բարդության և պարզ։

Արուսյակ Կոստանյանը վստահեցնում է՝ աշխատանքը ստեղծել է ինքնաբուխ և տարիների ընթացքում կուտակված էմոցիաների արդյունքում։

«Ընտրել եմ սիրված ստեղծագործություններ։ Փոխադրումների և մեթոդական ցուցումների ներկայացման ձևաչափը կօգնի հաղթահարել դժվարությունները, որոնք հանդիպում են ստեղծագործությունները կատարելիս»,-նշեց Արուսյակ Կոստանյան ու հավելեց, որ իր հեղինակած աշխատությունն ուղղված է երաժիշտ-կատարողների մասնագիտական-գեղագիտական կրթությանը, ճաշակի ձևավորմանն ու զարգացմանը։

Համերգ-շնորհանդեսին ներկա էր նաև Հայաստանի կոմպոզիտորների միության նախագահ Արամ Սաթյանը։ Վերջինս բարձր գնահատեց և' աշխատության լույսընծայումը, և' այդ աշխատանքները համերգով ներկայացնելու ձևաչափը․ «Շատ հաճելի է լսել երգեր, որոնք ժամանակին սիրված էին,  ճանաչված։ Փոխադրումները վերապրեցնում են մեր կյանքը՝ յուրատեսակ նկարագրությամբ»,-նշեց Արամ Սաթյանը։