ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Այսօր Մանկավարժական համալսարանում հյուրընկալվել էին Մոսկվայի պետական հոգեբանամանկավարժական համալսարանի ներկայացուցիչները՝ Փորձարարական հոգեբանության ինստիտուտի փոխնախագահ Եվգենի Խոզեն, Օտարերկրյա դիմորդների հարցերով զբաղվող բաժնի ղեկավար Շուշանիկ Ուսուբյանը և Աննա Զիկեևան։

ՀՊՄՀ Աշխատակազմի և միջազգային համագործակցության գծով պրոռեկտոր Մարիաննա Հարությունյանի հետ հանդիպման ընթացքում կողմերն ընդգծեցին երկու բուհերի միջև գործընկերությունը խորացնելու և նոր փուլ տեղափոխելու անհրաժեշտությունը։

Պրոռեկտորը Մոսկվայի պետական հոգեբանամանկավարժական համալսարանի աշխատակիցներին վստահեցրեց՝ կառույցի գործընկերների շարքում բուհը հատուկ տեղ է զբաղեցնում։ Այդ են փաստում ռուսաստանյան բուհի մասին Մանկավարժականի ուսանողների կարծիքներն ու տպավորությունները։

Մարիաննա Հարությունյանը հորդորեց ներկայացվող ծրագրերն իրագործել գործնականում, մասնավորապես՝ Կրթության հոգեբանության և սոցիոլոգիայի ֆակուլտետի հետ համատեղ աշխատանքում։

Պրոռեկտորը հույս հայտնեց, որ առաջիկայում կվերսկսվի «Ամառային դպրոց» միջազգային ծրագիրը, որին տարիներ շարունակ մասնակցել են նաև Մոսկվայի պետական հոգեբանամանկավարժական համալսարանի ուսանողները։

Ի դեպ, նույն համալսարանի Օտարերկրյա դիմորդների հարցերով զբաղվող բաժնի ղեկավար Շուշանիկ Ուսուբյանը ևս ուսանողական տարիներին եղել է ծրագրի մասնակից։

Այսօր արդեն լինելով ՀՊՄՀ-ի գործընկեր բուհի ներկայացուցիչ՝ կարծում է, որ ժամանակն է վերականգնել գործընկերությունը․ ընդհանուր հետաքրքրությունների շրջանակն է պահանջում։

Հանդիպման ընթացքում Փորձարարական հոգեբանության ինստիտուտի փոխնախագահ Եվգենի Խոզեն ներկայացրեց բուհի գիտական ուղղվածությունը՝ ընդգծելով, որ պատրաստում են հոգեբան-հետազոտողների լուրջ սերունդ։

Հանդիպման ընթացքում կողմերը քննարկեցին նաև երկու բուհերի ընդհանրությունների, մասնագիտական ծրագրերի ադապտացման հնարավորությունների, տարբեր ծրագերում ուսանողների ներգրավվածության մասին։

Մոսկվայի պետական հոգեբանամանկավարժական համալսարանի ներկայացուցիչներն այցելեցին նաև ՀՊՄՀ Կրթության հոգեբանության և սոցիոլոգիայի ֆակուլտետ, հանդիպեցին դասախոսական կազմին, ուսանողներին, ներկայացրին Ռուսաստանում հոգեբանական ուղղվածությամբ առաջին բուհի ստեղծման պատմությունը, առաքելությունը, կառուցվածքը, ֆակուլտետներն ու ինստիտուտները։

Պայմանավորվածություն ձեռք բերվեց հոգեբանության ոլորտում փորձի փոխանակման և հետագա համագործակցության կարևորության մասին։