ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

ՀՊՄՀ-ի ռեկտոր Սրբուհի Գևորգյանը Գիտական խորհրդի որոշմամբ Հունգարիայի Պիտեր Պազմանի կաթոլիկ համալսարանի հայագիտության ամբիոնի վարիչ դոկտոր Բալինտ Կովաչին պարգևատրեց  «Խաչատուր Աբովյան» մեդալով։

Այն բուհի հիմնադրման 100-ամյակին նվիրված հոբելյանի շրջանակներում օտարերկյա գործընկերներին առաջին պարգևատրումն է։

Ռեկտորն իր խոսքում նշեց, որ Բալինտ Կովաչը վաղուց արդեն հյուր չէ, այլ բուհի բարեկամ, որի հետ գործընկերությունը դուրս է գիտակրթական շրջանակներից։

Արցախյան 44-օրյա պատերազմից հետո, նաև նրա անմիջական միջնորդությամբ, Ադրբեջանի գերեվարած հինգ հայորդի վերադարձավ տուն․«Համոզված եմ, որ մարդասիրական և հայանպաստ  գործընկերությունը կշարունակվի, իսկ գիտակրթական, գիտամեթոդական, կրթական  ոլորտներում դրանք կունենան նոր դրսևորումներ»։

Մանկավարժական և Հունգարիայի Պիտեր Պազմանի Կաթոլիկ համալսարանների միջև  երկկողմանի համաձայնագիր է կնքվել դեռևս  2016 թվականին։

Համագործակցության շրջանակներում բուհի Պատմության և հասարակագիտության ֆակուլտետի և Պիտեր Պազմանի կաթոլիկ համալսարանի միջև իրականացվում են գիտակրթական մի շարք ծրագրեր․  բացվել է նաև հայագիտական ամբիոն, որի վարիչը հայագետ, դոկտոր Բալինտ Կովաչն է։

Պատմության և հասարակագիտության ֆակուլտետի դեկան Էդգար Հովհաննիսյանն իր խոսքում նկատում է՝ ամբիոնը, որի հիմնումը հավակնոտ քայլ էր դիտվում, գիտակրթական կենտրոնից այսօր արդեն  վերածվել է հանրային դիվանագիտության կարևոր օղակի․«Վերջին իրադարձությունները ցույց տվեցին՝  նրանք ոչ միայն հայագետ են, այլև՝ հայասեր։ Պարգևն, անշուշտ, կնպաստի հետագա գործունեությունն առավել պատասխանատու և ընդգրկուն դարձնելուն»։

Ի դեպ, պարգևատրմանը ներկա էին նաև Հունգարիայի Պիտեր Պազմանի Կաթոլիկ համալսարանի պրոֆեսոր  Շանդոր Օզեն և դոկտոր Կրիշտոֆ Սուրոմին, որոնք բուհում մասնակցում են միջազգային գիտաժողովի։

Բալինտ Կովաչի կյանքում Հայասատանն ու հայերին բացահայտելու գործում Էդգար Հովհաննիսյանը կարևորեց պրոֆեսոր Օզենի  դերը․հենց նրա ղեկավարմամբ է տարիներ առաջ բացահայտել և գրել Հունգարիայի հայկական համայնքում ապրող հայերի մասին, սիրահարվել հայ մշակույթին ու մեր երկրին․«Նա իրեն հայ է զգում․ սա մեր համագործակցության հաջորդ կարևոր, բայց ոչ վերջին քայլն է»,-հավելեց դեկանը։

Բալինտ Կովաչը շնորհակալություն հայտնեց «Խաչատուր Աբովյան» մեդալով պարգևատրելու համար և Սրբուհի Գևորգյանին փոխանցեց Պիտեր Պազմանի կաթոլիկ համալսարանի ռեկտորի շնորհավորանքը՝ բուհի 100-ամյակի առթիվ։