- Հայ
- Рус
- Eng
Այսօր ՀՊՄՀ ռեկտոր Սրբուհի Գևորգյանն ու Հայաստանի պատմության թանգարանի տնօրեն Դավիթ Պողոսյանը ստորագրեցին համագործակցության հուշագիր։
Հուշագրի համաձայն՝ ավարտական և մագիստրոսական աշխատանքների իրականացման նպատակով բուհի ուսանողները կստանան թանգարանային խորհրդատվություն, կկազմակերպվեն պրակտիկաների, գործնական պարապմունքների, մասնագիտական սեմինարների, թեզերի հանդիսավոր պաշտպանություններ թանգարանում և համալսարանում:
Հուշագրի շրջանակներում՝ երկու հաստատությունների համար կիրականացվեն մասնագիտական կամավորական կամ հատուկ ծրագրավորված աշխատանքներ, ինչպես նաև գիտական հրատարակությունների և տեղեկատվության փոխանակում:
Բացի այդ, կկազմակերպվեն համալսարանի դասախոսների և թանգարանների աշխատակիցների փոխադարձ հանդիպումներ, դասախոսություններ, վարպետության դասեր, գիտագործնական աշխատանքներ:
Հայաստանի պատմության թանգարանի տնօրեն Դավիթ Պողոսյանը նշեց՝ ուրախ է մայր թանգարանում հյուրընկալել մանկավարժական մայր համալսարանի ղեկավարությանը՝ վավերացնելու մշակութային, գիտակրթական երկարամյա հարաբերությունները:
«Թանգարանի և Մանկավարժական համալսարանի գործունեության առանցքները շատ դեպքերում հատվում են՝ կրթության, մասնագիտական զարգացման գիտության, մշակութային ժառանգության պահպանության, մեկնաբանման տեսանկյունից և երկրում տարբեր զարգացումներին նպաստելու առաքելությամբ: Կրթությունը թանգարանի համար էլ կարևոր նշանակություն ունի, և մեր նպատակներից մեկն է, որ թանգարանը դառնա կրթական կարևոր կենտրոն մեր երկրի համար և նրա սահմաններից դուրս»,-նշեց թանգարանի տնօրենն ու պատրաստակամություն հայտնեց տարբեր գործընթացներում բուհի հետ համատեղ ջանքեր ներդնելու գործում:
Դավիթ Պողոսյանի համար հուշագրի կնքումը կրկնակի կարևոր է. մի կողմում հարազատ բուհն է, մյուս կողմում՝ հարազատ հաստատությունը: Լիահույս է՝ հուշագիրը լոկ փաստաթուղթ չի լինի, այլ կվերածվի մասնագիտական զարգացման, համատեղ ջանքեր ներդնելու նոր մեկնարկի՝ մեր ինքնությունը, ազգային ժառանգությունը պահպանելու և դրա հիմքով զարգանալու համար:
Մանկավարժական համալսարանի ռեկտոր Սրբուհի Գևորգյանը շնորհակալություն հայտնեց նախաձեռնության համար և հույս հատնեց, որ հուշագիրը երկուստեք կարևոր կլինի՝ ի նպաստ կրթության, մշակութային, պատմական կրթության զարգացումների համար:
«Մեր գործունեության առանցքում ուսանողն է: Որոշ ֆակուլտետների ուսանողների համար սա հիանալի հնարավորություն և միջավայր է՝ զարգացնելու մասնագիտական կարողությունները, արժևորելու պատմական ժառանգությունն ու ինքնության պահպանման կարևորությունը: Սա հնարավորություն կստեղծի փոփոխվող աշխարհում՝ փոփոխված արժեքներ ունեցող սերունդների համար հնարավորինս մատչելի ներկայացնել այն արժեքները, որի կրողն ենք մենք»,-նշեց ռեկտոր Գևորգյանն ու վստահեցրեց՝ այս համագործակցությունը հետաքրքիր երկխոսության նոր փուլ է:
Հուշագրի ստորագրումից հետո Մանկավարժական համալսարանի ղեկավարությունը Հայաստանի պատմության թանգարանի տնօրեն Դավիթ Պողոսյանի ուղեկցությամբ շրջեց թանգարանում:
