ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Սեպտեմբերի  23-ը  Լսողության խանգարումներ ունեցող անձանց միջազգային օրն է: Մանկավարժական  համալսարանի Հատուկ և ներառական կրթության ֆակուլտետի Ուսանողական խորհրդի նախաձեռնությամբ օրը նշանավորվեց Մտագրոհ-2» ինտելեկտուալ խաղ-մրցույթով:

«Նախաձեռնության նպատակը լսողության խանգարում ունեցող անձանց իրավունքների մասին իրազեկելն  ու նոր գիտելիքներ հաղորդելն է»,-old.aspu.am-ի հետ զրույցում նշեց  ֆակուլտետի Ուսանողական խորհրդի նախագահ Մադլեն Մինասյանը: 

Խաղին մասնակցում  էր 6 թիմ, յուրաքանչյուրում ընդգրկված էին  համալսարանի բոլոր ֆակուլտետների,  ՀՊՄՀ-ի Հենակատային  վարժարանի, ինչպես նաև Երևանի լսողության խանգարումներ ունեցող երեխաների հատուկ կրթահամալիրի   5-ական  մասնակից: 

Հատուկ կրթահամալիրի սաների մատուցմամբ «Ապրել խաղաղ» երգը ժեստերի լեզվով ազդարարեց  միջոցառման սկիզբը, ապա վիճակահանությամբ ընտրվեցին թիմերի կազմերը:

«Մտագրոհ-2» ինտելեկտուալ խաղ-մրցույթի ժյուրիի կազմում  էին ֆակուլտետի դեկան, պրոֆեսոր  Սիրանուշ Կարապետյանը, Հատուկ մանկավարժության և հոգեբանության ամբիոնի վարիչ, դոցենտ Թերեզա Ազատյանը, մանկավարժական գիտությունների թեկնածու, դոցենտ Սվետլանա Մուրադյանը,  բուհի Ուսանողական խորհրդի նախագահ Պարույր Գալստյանը:

Ժյուրիի կազմում էին նաև «Միսս աշխարհ» հեղինակավոր մրցույթի 2019 թվականի հաղթող Լիանա Ոսկերչյանը, ով զբաղվում է հատուկ կարիք ունեցող երեխաների հարցերով, ինչպես նաև  նորաձևության մարկեթինգի մասնագետ Աննա Սալոմեն:

Ամփոփելով մրցույթի արդյունքները՝ 18 միավորով հաղթող ճանաչվեց «Վարդագույն» թիմը, որի կազմում էին՝ Նոննա Կարապետյանը Էլեն Պողոսյանը, Դիանա Կիրակոսյանը, Էլեն Մարգարյանն ու Դավիթ Ամիրշատյանը:

Միջոցառմանը մասնակցում էին դասախոսներ և ուսանողներ, ինչպես նաև ERASMUS+ ծրագրի շրջանակներում Հայաստանում գտնվող չեխ հյուրերը:

«Մտագրոհ» ինտելեկտուալ խաղ-մրցույթին ակտիվ մասնակցության համար տրվեցին շնորհակալագրեր և մասնագիտական գրականություն: