- Հայ
- Рус
- Eng
Մանկավարժական համալսարանի Հատուկ և ներառական կրթության ֆակուլտետի ղեկավար կազմը՝ դեկան Սիրանուշ Կարապետյանի գլխավորությամբ, դասախոսները, Պրակտիկայի կենտրոնի ղեկավար Հասմիկ Առաքելյանն ու «Սեքսուալ առողջության պաշտպանություն» ՀԿ-ի տնօրեն, սեքսոպաթոլոգ Ռուզաննա Ազատյանը հյուրընկալվել էին «Երջանկության ճանապարհ» բարեգործական հասարակական կազմակերպությունում։
Վերջիններիս մասնակցությամբ տեղի ունեցավ ինտերակտիվ հանդիպում-քննարկում՝ «Երջանկության ճանապարհ»-ի շահառուների ծնողների հետ:
«Ծնողավարման հմտություններ» թեմայով սեմինարի ընթացքում քննարկվեցին մի շարք հարցեր, այդ թվում՝ թույլատրել, թե արգելել, տարիքին համապատասխան հոգեկանի ձևավորման, նյարդային լարվածության և վախերի, ճգնաժամային իրավիճակների և ճգնաժամերի, կոնֆլիկտների հաղթահարման, ծնող–մեծահասակ /երեխա/ կապի ամրապնդման, սպառնացող վտանգների ու ծնողների վարքի կարգավորման վերաբերյալ։
Կողմերը կարևորեցին և բարձր գնահատեցին հանդիպում-քննարկման արդյունքները․առաջիկայում խնդրահարույց թեմաների վերաբերյալ շահառուների համար կկազմակերպվեն առանձին հանդիպումներ։ Նրանց հետ աշխատանքներ կանցկացնեն ՀՊՄՀ-ի հատուկ մանկավարժներն ու հոգեբանները։
Պայմանավորվածության համաձայն՝ նոր ուսումնական տարում բուհի ուսանողներն իրենց շարունակական և մանկավարժա-հոգեբանական պրակտիկան ևս կանցկացնեն «Երջանկության ճանապարհ» բարեգործական հասարակական կազմակերպությունում։ Հանդիպումների ընթացքում բարձրացված հարցերը տեղ կգտնեն նաև մագիստրոսների ավարտական աշխատանքներում։
Հիշեցնենք, որ ՀՊՄՀ-ի և «Երջանկության ճանապարհ» ՀԿ-ի միջև վերջերս կնքվել էր համագործակցության հուշագիր, որ հնարավորություն է տալիս համատեղ իրականացնել հետազոտական աշխատանքներ, կազմակերպել ուսանողների գործնական, ուսումնական գործընթացներ, սեմինարներ, կլոր սեղան-քննարկումներ:
Հուշագրի համաձայն՝ կիրականացվեն նաև ուսումնական գրականության փորձաքննություն, մասնագիտական խորհրդատվություն՝ ներառական կրթության համատեսքստում:
