Սկզբնական կրթության ֆակուլտետի Գրական ակումբի ղեկավար Եվա Մնացականյանի նախաձեռնությամբ ուսանողներն հյուրընկալել էին բանաստեղծ, արձակագիր Լիպարիտ Սարգսյանին:
Գրական ակումբի անդամները ներկայացրին հեղինակի հատկապես մանկագրության ժանրի ստեղծագործությունները՝ ցերեկույթը հարստացնելով նրա գրվածքների ասմունքով, երգ ու պարով:
Գրական ակումբի ղեկավար Եվա Մնացականյանը շնորհակալություն հայտնեց գրողին՝ հյուրնկալվելու և գրական ժառանգության համար՝ վստահեցնելով, որ դրանցում յուրաքաչյուրը գտել է իր մանկությունը:
«Մանկություն՝ տաքություն, միամտություն, ճոճանակի ձայն և այլն, որ բոլորի մոտ կարծես տարբեր է, սակայն նույնն է միայն մի բան՝ մաքրություն, որ համեմում է բոլորի մանկությունը»,-նշում են ապագա մանկավարժները և վստահեցնում, որ կյանքի երկարուձիգ ճանապարհին մշտապես կհիշեն և կառաջնորվեն գրողի խորհուրդներով, մարդ լինելու և մնալու բանաձևով:
Ցերեկույթի ընթացքին լռությամբ հետևող հեղինակը ավարտին միայն խոստովանեց՝ այդ լռության մեջ հիշողություններ էին, որ փորձում էր ողջ ընթացքում բազում թելերով անցյալը կապել ներկայի հետ:
Լիպարիտ Սարգսյանը վստահեցրեց՝ մանկական յուրաքանչյուր սետղծագործություն սկիզբ է առել իր երեխաների և թոռների հետ կենդանի շփումից. «Երեխաները դրախտում ապրող այն էակներն են, որ ուղիղ և անկողմնակալ կարծիք ունեն: Նրանց հետ աշխատելիս համոզվել եմ՝ նրանք լավն ավելի ճիշտ են նկատում»,-նշեց երեխաների հետ աշխատանքում փորձառու գրողն ու ապագա մանկավարժներին հորդորեց երեխաների հետ կենդանի շփումից դասեր քաղել. կյանքը միշտ էլ նյութ է տալիս:
