ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

ՀՀ գիտությունների ազգային ակադեմիայում երկրի գիտական ներկայացուցիչները, մտավորականությունը շնորհավորեց ՀՀ ԳԱԱ նախագահ ակադեմիկոս Ռադիկ Մարտիրոսյանի ծննդյան 80-ամյա հոբելյանը:

Խաչատուր Աբովյանի անվան հայկական պետական մանկավարժական համալսարանը միանում է այդ առթիվ հնչած շնորհավանքներին.

Ջերմորեն շնորհավորում եմ Ձեզ հրաշալի հոբելյանի՝ ծննդյան 80-ամյակի կապակցությամբ:  Վստահորեն կարող եմ ասել, որ Ձեր ամեն օրը հայրենի գիտության ու կրթության  գործին անշահախնդիր նվիրումի տուրք է: Ձեր կենսագրությունը հանրապետության մայր բուհի՝ Երևանի պետական համալսարանի, Բյուրականի աստղադիտարանի, Ռադիոֆիզիկայի և էլեկտրոնիկայի ինստիտուտի,  և ընդհանրապես հանրապետության գիտակրթական առաջընթացի բազմաբեղուն պատմության մեջ է:

Տարիներ շարունակ որպես համալսարանների միջազգային և համաեվրոպական խորհուրդների լիիրավ անդամ և Հայաստանի պետական բուհերի ռեկտորների խորհրդի նախագահ՝ անուրանալի ծառայություններով նպաստել եք Հայաստանի գիտակրթական ոլորտի ինտեգրմանը միջազգային կառույցներին, իրականացրել գիտամշակութային և  ուսումնակրթական տարբեր ծրագրեր:

80-ամյա հոբելյանը գեղեցիկ առիթ է ՝ արժևորելու այդ ճանապարհը, կրկին թերթելու Ձեր կենսագրության հարուստ ու հետաքրքիր էջերը և հպարտանալու Ձեր ակնառու հաջողություններով:

Շնորհավորում եմ  և մաղթում նոր հաջողություններ, երջանկություն և բարօրություն՝ հանուն հայրենական գիտության  ասպարեզում նոր ձեռքբերումների:

ՌԵԿՏՈՐ՝ ՌՈՒԲԵՆ ՄԻՐԶԱԽԱՆՅԱՆ