ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

«Աշխարհքի կարգն է, ինչպես եկել է, էնպես էլ կգնա». հայտնի «Կիկոսի մահը» հեքիաթի այս պատգամը Մանկավարժականի բեմից ներկաներին հղեցին «Փրկություն» հաշմանդամ երեխաների և երիտասարդների կենտրոնի թատերական խմբակի երեխաները:

Խմբակի գեղարվեստական ղեկավար Կարինե Մարգարյանի ջանքերով մտավոր խնդիրներ ունեցող հաշմանդամ երեխաները բեմում փայլեցին իրենց դերասանական ունակություններով՝ ստիպելով հանդիսատեսին հավատալ ու վստահել իրենց ուժերին:

Ներկայացման դերակատարներից Ապրելիկ Ազարյանը 2000 թվականին արագ վազքի մրցույթում զբաղեցրել է 4-րդ տեղն ու արժանացել մրցանակի: Այսօրվա ներկայացումը համարում է իր երկրորդ պարգևը. հանդիսատեսի ժպիտներն ու անսպառ ծափողջույնները նրան վստահեցրին՝ իրենք առավել քան հզոր են:

«Ներդաշնակ հասարակություն համատեղ ջանքերով» խորագիրը կրող միջոցառումը շարունակվեց համերգային ծրագրով. հաշմանդամներին իրենց կատարումներով ողջունեցին «Ոսկե լարեր» կիթառի համույթը, Հատուկ կրթության ֆակուլտետի ուսանողներ Տաթևիկ Սերոբյանը, Շուշան Զաքարյանը: Ի դեպ, վերջինս ժեստերի լեզվով կատարեց «Մայրիկ» երգը:

«Փրկություն» հաշմանդամ երեխաների և երիտասարդների կենտրոնի նախագահ Արփինե Աբրահամյանն իր երախտագիտությունը հայտնեց համալսարանի հետ արդյունավետ համագործակցության, ջերմ ընդունելության և ուսանողների՝ անմնացորդ նվիրումի համար:

«Յուրաքանչյուր բեմել այս երեխաների համար մեծ իրադարձություն է և անմոռաց հուշ: Այսօրվանից ստացած տպավորությունները նրանք դեռ երկար կհիշեն»,-նշեց կենտրոնի նախագահն ու ավելացրեց, որ հանդիսատեսի ջերմ ընդունելությունն էր նրանց հաջող ելույթի գրավականը:

Միջոցառման ավարտին բոլոր մասնակիցները ստացան շնորհակալագրեր:

Նշենք, որ 1992 թվականին ՄԱԿ-ը դեկտեմբերի 3-ը հռչակեց Հաշմանդամների միջազգային օր: 2006 թվականին դեկտեմբերին Հայաստանը միացավ հաշմանդամների իրավունքների պաշտպանության կոնվենցիային, իսկ արդեն 2008 թվականի փետրվարին Հայաստանում ստեղծվեց հաշմանդամություն ունեցող անձանց հարցերով զբաղվող ազգային հանձնաժողով: