ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

«Նոր ուսուցիչ նոր դպրոցի համար» խորագիրը կրող գիտաժողովի IV մասնաճյուղում զեկուցողներն անդրադարձան բնական գիտություններին՝ ներկայացնելով մանկավարժական կրթության բարեփոխման նոր հեռանկարները:

Սեկցիայի նախագահ, Կենսաբանության, քիմիայի և աշխարհագրության ֆակուլտետի դեկան Սվետլանա Հովակիմյանը մասնակիցներին ծանոթացրեց գիտաժողովի ընթացակարգին, կոչ արեց ցուցաբերել ակտիվ մասնակցություն և կազմակերպել առողջ գիտական քննարկում:

Կենսաբանության ուսուցման գործընթացում ավագ դպրոցի աշակերտի գիտական աշխարհայացքի ձևավորման մեթոդական համակարգին անդրադարձավ մասնաճյուղի համանախագահ, Կենսաբանության և նրա դասավանդման մեթոդիկայի ամբիոնի վարիչ, կենսաբանական գիտությունների դոկտոր, պրոֆեսոր Տիգրան Թանգամյանը:

Վերջինս տարբեր աղյուսակների ձևով ներկայացրեց ստուգիչ և փորձարարական դասարանների այն տվյալները, որոնցով պարզ է դառնում, թե ավագ դպրոցի աշակերտը որքանով է պատկերացում կազմում գիտական աշխարհայացքի մասին: Տիգրան Թանգամյանն անդրադարձավ նաև 2010 թվականին լույս տեսած այն ձեռնարկին, որը ընդունվեց որպես կենսաբանության առարկայի շրջանակում աշխարհայացքը ձևավորող հիմք:

Կենսաբանության և նրա դասավանդման մեթոդիկայի ամբիոնի դասախոս, մանկավարժական գիտությունների թեկնածու, դոցենտ Ալետա Ներկարարյանն իր՝ «Էկոլոգիական հասկացությունների ձևավորման գիտամեթոդական հիմնավորումը» թեմայով զեկույցում կարևորեց էկոլոգիական դաստիարակությունն ու դրան ուղղված նոր մեթոդների, ուսումնական ծրագրերի ներմուծումը:

Նկատելով բոլոր մասնագետների հանդեպ ներկայացվող պահանջների մեծացումը ներկա ժամանակներում՝ Ալետա Ներկարարյանը կարևորեց հատկապես ստեղծագործող ուսուցչի դերն ու նշանակությունը քաղաքակիրթ մարդ ձևավորելու գործում:

Ծանոթանալով բազմաթիվ գիտափորձերի արդյունքներին՝ ներկաների համար պարզ դարձավ, որ էկոլոգիական դաստիարակության գործում տարվող աշխատանքը բավարար չէ. դրա արդյունքում աշակերտները ֆլորայի, ֆաունայի վերաբերյալ չունեն նույնիսկ տարրական գիտելիքներ: Ներկայացնելով նոր դպրոցի համար նոր ուսուցչի իր մոդելը՝ Ալետա Ներկարարյանն առաջարկեց վերանայել ուսումնական ծրագրերն ու առավել շատ կազմակերպել էկոլոգիական շրջայցեր:

Էկոլոգիական, դեղագործության կառավարման դասավանդման և որոշ այլ առանձնահատկություններին հաջորդ զեկույցներում անդրադարձան մասնաճյուղի մյուս մասնակիցները:

Հատուկ հոգեբանության, հատուկ մանկավարժության, առաջին բուժօգնության և սպորտի ոլորտի վերաբերյալ զեկուցումներով հանդես եկան VI մասնաճյուղում:

Հատուկ կրթության ֆակուլտետի դեկան, մանկավարժական գիտությունների թեկնածու, դոցենտ Արմենուհի Ավագյանն իր զեկույցում ներկայացրեց Հայաստանում ներառական կրթության համակարգի ձևավորումը, այդ ոլորտում մեր պետության ունեցած հաջողություններն ու ակնկալիքները: Անդրադառնալով ներառական կրթության ոլորտում իրականացվող պարբերական վերապատրաստումներին, կոնֆերանսներին և շարունակական բարեփոխումներին՝ նա ցավով նշեց նաև ոլորտում առկա բացթողումները:

Մտավոր հետամնաց կրտսեր դպրոցականների՝ առարկաների տարածական պատկերացումների ձևավորման մոտեցումներն իր հոդվածում ներկայացրեց Հատուկ կրության ֆակուլտետի գիտության և հետբուհական կրթության գծով փոխդեկան, հատուկ մանկավարժության և հոգեբանության ամբիոնի դոցենտ, մանկավարժական գիտությունների թեկնածու Թերեզա Ազատյանը:

Մասնաճյուղի աշխատանքները շարունակվեցին նաև այլ թեմաների շուրջ զեկուցումներով:

Հաշվի առնելով միջանձնային հարաբերությունների, սեռադերային պատկերացումների նոր որակական մոտեցումները՝ ԱԻ և ՔՊ ամբիոնի վարիչի պաշտոնակատար մանկավարժական գիտությունների թեկնածու, դոցենտ Հակոբ Գրիգորյանն իր զեկույցում անդրադարձավ երիտասարդության սեռական դաստիարակության կենսաբանաբժշկական առանձնահատկություններին:

Ընդգծելով դրանց տեսական և գիտական նշանակությունը՝ վերջինս ներկայացրեց նաև տեղեկատվական միջոցների բացասական դերն ու հետևանքները:

Այս մասնաճյուղի այլ զեկույցներում անդրադարձ եղավ նաև մանկավարժության ոլորտում աղետների ռիսկերի նվազեցման ուղիներին, դրանց մշակույթի ձևավորման առանձնահատկություններին (Պերճ Կարապետյան) և այլ թեմաների: