Այսօր Հատուկ կրթության ֆակուլտետի նախաձեռնությամբ Մանկավարժական համալսարանում հյուրընկալվել էին Շվեդիայի Ուպսուլա համալսարանի Հատուկ կրթության բաժնի
պրոֆեսորներ Ռոլի Հելլդինն ու Մագնուս Մագնուսոնը:
Տեմպուս ծրագրի շրջանակում Հայաստան ժամանած հյուրերը բուհի պրոֆեսորադասախոսական կազմի և ուսանողների հետ հանդիպման ընթացքում հանդես եկան բացառիկ դասախոսությամբ:
Ռոլի Հելլդին նախ պատմական ակնարկ կատարեց` ներկայացնելով իրենց ուսումնական հաստատությունում Հատուկ կրթության բաժնի հիմնադրումը, գործունեությունն ու ներկայումս տարվող աշխատանքները, ապա անդրադարձավ ոլորտի հիմնախնդիրներին:
Շվեդ պրոֆեսորը նշեց, որ նախկինում առանձնահատուկ կարիքներ ունեցողները մեկուսացված էին հասարակությունից, կրթական համակարգում կար որոշակի խտրականություն և անհավասար վերաբերմունք.«Ժամանակին նույնսիկ վեճ էր ծագել մանկավարժների և բժիշկների, հոգեբույժների միջև: Նրանք բաժանվել էին խմբերի.առաջինները դեմ էին ներառական կրթությանը, իսկ մյուս մասն էլ պնդում էր` այն կնպաստի հասարակության բոլոր անդամների հավասարեցմանը»,-ասաց Ռոլի Հելլդին`հավելելով.«Դեմոկրատական պետություն դառնալու հիմքերից մեկն էլ ներառական կրթության ներդրումն է»:
Լինելով հատուկ կրթության ոլորտի փորձառու մասնագետ ` պրոֆեսորը չափազանց կարևորեց` հանրակրթական հաստատություններում կրթության առանձնահատուկ պայմանների կարիք ունեցող երեխաների հավասար իրավունքներ ունենալը:
Ռոլի Հելլդինգիտակցում է, որ դա կարող է որոշակի խնդիրներ առաջացնել, բայց շտապում է նաև հիշեցնել` պետք է շարունակել նոր մեթոդների ներդրումն ու ներառական կրթական համակարգի ընթացակարգի կատարելագործումը:
Պրոֆեսոր Մագնուս Մագնուսոնն երկխոսության միջոցով դասախոսության ընթացքում խոսեց Շվեդիայի կրթական համակարգի առանձնահատկությունների`հատկապես մագիստրոսական թեզերի, քննաշրջանի անցկացման մասին:
Վերջինս ընդգծեց, որ ուսանողների ինքնուրույնությունը հասցված է առավելագույնի, իսկ մագիստրոսական թեզերի պաշտպանության ընթացքում նրանք կարող են հանդես գալ նույնիսկ որպես ընդդիմախոսներ:
Խոսելով հայաստանյան ներառական կրթական համակարգի մասին` օտարեկրյա մասնագետը նշեց.«Հասարակության ներգրավվածությունն ու ոլորտի զարգացումը նոր թափ է ստանում, իսկ հիմնական խոչընդոտը շարունակում է մնալ ֆինանսական ռեսուրսի բացակայությունը»:
Դասախոսության ավարտին պրոֆեսորը վստահեցրեց`հաջորդ հանդիպմանը ոլորտի հիմնախնդիրենրը կուսումնասիրվեն նոր հարթության մեջ, որի մաս կկազմի նաև շվեդերենի ուսուցումը:
Հատուկ կրթության ֆակուլտետի դեկան Արմենուհի Ավագյանը դասախսության ավարտին իր գոհունակությունը հայտնեց`նշելով.«Հրավերքի նպատակն էր ուսանողներին ծանոթացնել շվեդական ներառական կրթության համակարգին: Մեզ մոտ հաճախ տպավորություն է ստեղծվում, որ առկա խնդիրները պայմանավորված են միայն մեր երկրով.նման հանդիպումները հերքում են այդ կարծրատիպերը, իսկ եվրոպական փորձն էլ ապագա մասնագետներին օգնում հաղթահարել ներառական կրթության ոլորտում առկա հիմնախնդիրները»:
