- Հայ
- Рус
- Eng
Օրերս Կենսաբանության, քիմիայի և աշխարհագրության ֆակուլտետի կենսաբանություն մասնագիտության I և II կուրսերի մագիստրոսներն իրենց գիտագործնական պրակտիկան
անցկացրեցին Արարատի մարզի “Unifish” ձկնային տնտեսությունում:
Կենսաբանության և նրա դասավանդման ամբիոնի պրոֆեսոր Սամվել Պիպոյանի ղեկավարությամբ ուսանողները ծանոթացան ձկնային տնտեսությունում աճեցվող թառափների մի շարք տեսակների, ծիածանախայտի, ծածանի (կոյ) բազմացման, կերակրման և պահպանման գործընթացներին:
Ապագա կենսաբանները եղան նաև Ռանչպար գյուղի հարևանությամբ գտնվող լճակային և ֆորելային տնտեսություններում,տեղում ծանոթացան բուծվող ձկնատեսակների բուծման հիմունքներին, Արարատյան հարթավայրի կիսաանապատային բուսականության առանձնահատկություններին և կատարեցին թռչունների գարնանային չուերի դիտարկումներ:
«Մագիստրոսների պատրաստման ծրագիրը նախատեսում է գիտամանկավարժական պրակտիկա, որի նպատակն է ուսանողներին նախապատրաստել ինչպես դասավանդման հմտություններին, այնպես էլ գիտահետազոտական, գիտամանկավարժական և գիտամեթոդական հետագա մասնագիտական գործունեություն ծավալելուն:
Հետազոտական պրակտիկան նաև նախապատրաստում է նրանց մագիստրոսական թեզ գրելուն»,-armspu.am-ի հետ զրույցում նշեց պրոֆեսոր Սամվել Պիպոյանը:
Ի դեպ, վերոնշյալ ծրագիրը ներառում է և´ գիտական, և´ վարչական աշխատանքներ կատարելու կոմպետենցիաներ, որոնք կնպաստեն ուսուցման ընթացքում ձեռք բերած տեսական գիտելիքների ամրապնդմանն ու գործնական աշխատանքի հմտություններին:
