ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Այսօր բացառիկ այցով Մանկավարժական համալսարանում էին իռլանդացի օսկարակիր սցենարիստ, ռեժիսոր, Թերենս Ջորջը, ճանաչված հասարակական գործիչ, հրապարակախոս, բարերար, Լոս Անջելեսի «Կալիֆորնիա կուրիեր» շաբաթաթերթի հրատարակիչ և խմբագիր Հարութ Սասունյանը:

Վերջիններս Հայաստանում էին Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի կազմակերպած գիտաժողովի շրջանակում:

Մանկավարժական համալսարանի ռեկտոր Ռուբեն Միրզախանյանը հյուրերի ներկայությունը բուհում մեծ պատիվ համարեց :

Հարութ Սասունյանը բուհի պրոֆեսորադասախոսական կազմին, ուսանողներին ամփոփ ներկայացրեց «Հայոց ցեղասպանություն. մարտահրավերներ հարյուրամյակի նախաշեմին» խորագիրը կրող միջազգային գիտաժողովում իր ելույթի առանցքային կողմերն ու սեփական դիտարկումներն այդ հարցի շուրջ:

Անդրադառնալով Հայոց ցեղասպանությանը, դրա ճանաչմանը, կորցրած տարածքների և վնասների հատուցմանը` «Կալիֆորնիա կուրիեր»-ի խմբագիրն ընդգծեց.« Ցեղասպանության 100-ամյակի առթիվ ոչ թե ճանաչում պետք է պահանջենք, այլ փորձենք ստանալ արդարություն:

Ժամանակն է դառնալ պահանջատեր.մի շարք երկրներ, միջազգային կազմակերպություններ արդենիսկ ընդունել են ցեղասպանության փաստը: Մեծամասշտաբ միջոցառումների միջոցով անհրաժեշտ է աշխարհի ուշադրությունը ևս մեկ անգամ հրավիրել ցեղասպանության ճանաչմանը»:

Հարութ Սասունյանը վստահ է `աշխարհին մեր պատգամը փոխանցելու համար նախ պետք է պայքարել և պահանջել արդարություն, իսկ դա իրականացնելու լավագույն նախապայմանը մեկ ընդհանուր գաղափար ունենալն է.«Թուրքական կառավարությունը լրջորեն հետևում է մեր կատարած յուրաքանչյուր քայլին.անհրաժեշտ է լուռ ծրագրավորել և ընդօրինակելով հրեաներին` սերնդեսերունդ փոխանցել ազգային պահանջատիրության գաղափարը»:

Լրագրողը, պատասխանելով ներկաների հարցերին, կարևորեց 1915 թվականի զոհերի համար հատուցում պահանջելն ու հայերի կորցրած հողատարածքների, բանկային հաշիվների ու փողերի վերադարձը:

Իռլանդացի սցենարիստ, ռեժիսոր, 2012 թվականի Օսկար մրցանակի արժանացած Թերենս Ջորջը խոսելով իր ծագման, Ռուանդայի ցեղասպանության մասին, անկեղծացավ` Հայաստան այցն իր համար խորքային նշանակություն ունի, իսկ երկու ժողովուրդների ուժը, մշակութային արժեքներն ու հաղթանակները պայմանավորում է հենց Ցեղասպանություն ապրելու հանգամանքով:

Անդրադառնալով ժամանակակից կինորավեսետին, ԶԼՄ-ի գործառույթներին` հոլիվուդյան սցենարիստը նշեց, որ դրանք այսօր լայն հնարավորություն են տալիս բացահայտել աշխարհում գոյություն ունեցող երևույթներն ու հաճախ նաև պատմական իրողությունները: Թերենս Ջորջը կոչ արեց երիտասարդներին սեփական պատմությունը ներկայացնել` օգտագործելով ժամանակակից տեխնոլոգիանները, մասնավորապես, համացանցն ու արվեստը:

Թե ինչու՞ մինչ այժմ Հոլիվուդում չի նկարահանվել Հայոց ցեղասպանության մասին որևէ ֆիլմ, սցենարիստը պատասխանեց. «Չնայած Հոլիվուդում նկարահանվել են քաղաքական ուղերձ պարունակող բազմաթիվ ֆիլմեր, սակայն այստեղ քիչ են հետաքրքրված արվեստով և քաղաքականությամբ: Հոլիվուդը գումար ստեղծելու համար է. քաղաքական թեմաները, ցեղասպանության մասին պատմող ֆիլմերը կոմերցիոն չեն դիտարկվում»:

Հանդիպման ավարտին Ռուբեն Միրզախանյանը հյուրերին պարգևատրեց Մանկավարժական համալսարանի 90-ամյա հոբելյանը խորհրդանշող մեդալով, հյուրերը շրջեցին համալսարանում, եղան բուհի թանգարանում :

Նշենք, որ Թերենս Ջորջը ծնվել և մեծացել է Հյուսիսային Իռլանդիայի Բելֆաստ քաղաքում: 1985 թվականին հանդես է եկել որպես դրամատուրգ` ներկայացնելով իր դեբյուտային «Թունել» դրաման: Որպես սցենարիստ եւ ռեժիսորի ասիստենտ հանդես է եկել 1993 թվականին Ջիմ Շերիդենի «Հանուն հոր» ֆիլմում:

Մի շարք ֆիլմերում («Բռնցքամարտիկը»,«Մի մոր որդի»), ռեժիսորն արծարծել է Հյուսիսային Իռլանդիայի հոգսերն ու մտահոգությունները: