ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Տարբեր երկրների 46 մասնակիցների հետ օլիմպիադային առաջին անգամ մասնակցում էին նաև Հայաստանի ներկայացուցիչները՝ Մանկավարժական համալսարանի Հատուկ կրթության ֆակուլտետի մագիստրատուրայի առաջին կուրսի ուսանողուհի Մարգարիտա Թումանյանն ու բակալավրիատի 4-րդ կուրսի ուսանող Արթուր Գևորգյանը:

Թեստային և պատկերային ներկայացումների փուլերով անցկացվող օլիմպիադային Մարգարիտա Թումանյանը ներկայացրել էր «PECS-ի կիրառումը աուտիզմով երեխաների հետ» թեմայով աշխատանքը, որին աջակցել էր Հատուկ կրթության Լոգոպեդիայի և վերականգնողական թերապիայի ամբիոնի վարիչ Ժաննա Պայլոզյանը:

Հատուկ մանկավարժության և հոգեբանության ամբիոնի դոցենտ Էլլա Կաֆյանի աջակցությամբ էլ Արթուր Գևորգյանը օլիմպիադայում ներկայացրեց «Զարգացման խնդիրներ ունեցող երեխաների ընտանիքների հոգեբանական ուղղորդումը Հայաստանում» թեման, որին, ի դեպ, անդրադարձել էր միայն Հայաստանի մասնակիցը:

Մ.Պ.Դրագոմանովի անվան ազգային մանկավարժական համալսարանի Տիֆլոմանկավարժության ամբիոնի վարիչ, պրոֆեսոր Ե.Պ. Սինևի նախագահությամբ կազմկոմիտեն երկու փուլերից հետո գնահատեց մասնակիցների աշխատանքները. Արթուր Գևորգյանը օլիմպիադայում զբաղեցրեց 3-րդ տեղը, իսկ Մարգարիտա Թումանյանը պարգևատրվեց՝ տարածաշրջանի փորձի լավագույն ներկայացման համար:

armspu.am-ի հետ զրույցում ուսանողները նշեցին՝ օլիմպիադան աննախադեպ հնարավորություն էր փորձի և գիտելիքների փոխանակման համար. «Ծանոթանալով օլիմպիադայի մասնակիցների թեմաներին՝ վստահ կարող ենք ասել, որ Հայաստանում հատուկ կրթությունը բարձր մակարդակի վրա է. բազմաթիվ երկրների ներկայացուցիչներ ծանոթ չէին ոչ PECS-ին, ոչ էլ մեզանում կիրառվող նորագույն մեթոդներին»,-նշեց Արթուր Գևորգյանը: