ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

«Թանգարանների գիշեր» միջոցառումների շրջանակում այսօր Մակավարժականի եռաչափ թանգարանը հագեցած էր մշակութային բազմաբնույթ միջոցառումներով:

 

Վաղ առավոտից թանգարան այցելող դպրոցականներին, ուսանողներին և մշակութասեր հասարակությանը «դիմավորում էր» Մեծ Լուսավորիչ Խաչատուր Աբովյանը՝ եռաչափ վիրտուալ ուղերձով:

 

Ներկաներին ողջունեց թանգարանի տնօրեն Ալվարդ Գրիգորյանը՝ ներկայացնելով «Թանգարանների գիշեր» միջոցառման ծրագիրը: Վերջինս տեղեկացրեց՝ չնայած առաջին անգամ են մասնակցում թանգարանների միջազգային օրվա շրջանակում անցկացվող միջոցառումներին, սակայն ուրախ է՝ վաղ առավոտից այցելուների հոսքը թանգարան չի դադարել:

 

«Թանգարանի աշխատակազմը ջանք չի խնայում տաբեր տարիքային խմբերի այցելուներին՝ բուհի ձեռքբերումներին, թանգարանի գիտա-կրթական հարուստ նյութերին ծանոթացնելու, տարաբնույթ միջոցառումներում ներգրավելու համար»:

 

Թանգարանի տնօրենը մեծ ուրախությամբ նշեց նաև ֆոնդի համալրման մասին. քանդակագործության դասախոս Միսաք Մելքոնյանը օրերս թանգարանին է նվիրել ականավոր լեզվաբաններ Հրաչյա Աճառյանի, Մանուկ Աբեղյանի, ինչպես նաև ՀՀ Ազգային հերոս Մովսես Գորգիսյանի կիսանդրիները:

 

Տոնական միջոցառումները մեկնարկեցին «Խաչատուր Աբովյանի անվան ՀՊՄՀ գիտական աշխատությունների մատենագիտություն (1940-1990թթ.)» գրքի շնորհանդեսով:

 

Գրադարանագիտության և մատենագիտության ամբիոնի վարիչ, գրքի խմբագիր Գագիկ Սուքիասյանը, խոսելով գրքի ճանաչողական և գիտատեղեկատվական կարևոր նշանակության մասին, նշեց՝ աշխատանքը եզակի է ոչ միայն իր բնույթով ու տեսակով՝ որպես պատմական հետադարձ մատենագիտության անկրկնելի օրինակ, այլև՝ ժամանակագրական առումով՝ ընդգրկելով շուրջ 50 տարվա (1940-1950 թթ.) ընթացքում ՀՊՄՀ-ում լույս տեսած 1908 միավոր հրատարակություն. «Գիրքն ունի առարկայական դասակարգման սկզբունք և հստակ պատկերացում է տալիս բուհի անցյալ դարի նշված ժամանակաշրջանի գիտակրթական գործի կազմակերպման ու զարգացման մասին»:

 

Գրադարանի մատենագիտության բաժնի նախկին վարիչ Ջուլիետա Սիմոնյանը Նարինե Դանիելյանի հետ գիրքը կազմողներից է: Նա խոստովանում է՝ իր համար սա երջանիկ օրերից մեկն է. սեղանին է դրվել իր 15 տարիների տքնաջան աշխատանքի արդյունքը. «Գիտության մեջ չկա կարճ ու հեշտ ճանապարհ. արդյունքի է հասնում նա, ով կարողանում է քայլել այդ քարքարոտ ու դժվարին ճանապարհով: Կապվեք գրքի հետ. գիտությունը հզոր ձեռք է մարդու կյանքում, որ նրան պետք է ուղեկցի ողջ կյանքում»:

 

Գրքի շնորհանդեսին հաջորդեց Գեղարվեստական կրթության ֆակուլտետի Նվագարանների ամբիոնի 2-րդ կուրսի քանոնահարների համույթը՝ Նարեկ Գրիգորյանի նվագակցությամբ՝ կատարելով կոմպոզիտոր Խաչատուր Ավետիսյանի ստեղծագործությունները:

 

Միջոցառումների շարքն ամբողջացրեց «Մասունք» ազգագրական երգի-պարի համույթի համերգը:

 

Մանկավարժական համալսարանի եռաչափ թանգարանի այցելուներին սպասում էր մեծ անկանկալ. շուրջ մեկուկես ժամ «Մասունք» ազգագրական երգի-պարի համույթի անդամների անմիջական ուսուցմամբ նրանք սովորեցին, թե ինչպես պարել ազգագրական պարեր:

 

Հիշեցնենք, որ Մանկավարժական համալսարանի նորագույն տեխնոլոգիաներով հագեցած թանգարանը բացվել է 2012 թվականի նոյեմբերին: Եռաչափ ֆորմատի թանգարանը նորույթ է. նման փորձ Հայաստանում եղել է, սակայն այս դեպքում առկա է նաև ձայնը: Մինչ օրս թանգարանն ունեցել է շուրջ 12 000 այցելու՝ այդ թվում տարբեր դպրոցների աշակերտներ, այլ բուհերի ուսանողներ, անվանի հասարակական-քաղաքական գործիչներ:

 

Ի դեպ, այս տարի «Թանգարանների գիշեր» ծրագիրը կրում է «Թանգարանը որպես ոչ ֆորմալ կրթության միջավայր» կարգախոսը: Միջոցառումն հնարավորություն է ընձեռում հասարակությանն անվճար հաղորդակից լինել թանգարանային անցուդարձին և նորովի բացահայտել թանգարաններում պահվող մշակութային արժեքները: