ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Օրերս մեկնարկեց ՀՀ Պաշտպանության նախարարին առընթեր հասարակական խորհրդի նախաձեռնությամբ կազմակերպված «Ռազմական հոգեբանության հիմնախնդիրները» թեմայով երկօրյա գիտաժողովը:

Գիտաժողովի աշխատանքներին մասնակցում էին Պաշտպանության նախարար Սեյրան Օհանյանը, պաշտպանության նախարարության և զինված ուժերի գլխավոր շտաբի համապատասխան ստորաբաժանումների ղեկավարներն ու ներկայացուցիչները, ռազմական և քաղաքացիական ուսումնական հաստատությունների ղեկավարներ, ոլորտի մասնագետներ:

Գիտաժողովի առաջին նիստում զեկույցով հանդես եկավ Հայկական պետական մանկավարժական համալսարանի ուսումնագիտական գծով պրոռեկտոր, հոգեբանական գիտությունների դոկտոր, պրոֆեսոր Սրբուհի Գևորգյանը:

Վերջինս իր զեկույցում ներկայացրեց դժվար կոնֆլիկտային իրավիճակներում միջանձնային արդյունավետ փոխազդեցությունների հոգեբանական մեխանիզմները, կոնֆլիկտների նախազգուշացման, կանխարգելման և հաղթահարման հոգեբանական ուղիները:

Գիտաժողովի 2-րդ և 3-րդ նիստերը շարունակվեցին Մխիթար Հերացու անվան պետական բժշկական համալսարանում, որտեղ հետազոտական աշխատանքների արդյունքների հիման վրա զինված ուժերում ինքնասպանությունների և դրանց փորձերի կանխարգելման վերաբերյալ գործնական առաջարկներ ներկայացրեց Մանկավարժական համալսարանի գիտահետազոտական կենտրոնի ղեկավար, հոգեբանական գիտությունների թեկնածու, դոցենտ Կամո Վարդանյանը:

Գիտաժողովում զեկույցներով հանդես եկան նաև ՀՊՄՀ Զարգացման և կիրառական հոգեբանության ամբիոնի վարիչ, հոգեբանական գիտությունների դոկտոր Սամվել Խուդոյանը, Պրակտիկայի վարչության պետ, հոգեբանական գիտությունների թեկնածու, դոցենտ Վահան Սարգսյանը, Կրթության հոգեբանության և սոցիոլոգիայի ֆակուլտետի դեկանի՝ գիտության և հետբուհական կրթության գծով տեղակալ, մանկավարժական գիտությունների թեկնածու, դոցենտ Հակոբ Թադևոսյանը:

Վերջինս armspu.am-ի հետ զրույցում նշեց՝ ռազմական հոգեբանության հանդեպ վերջին տարիների վերաբերմունքը պայմանավորված է ինչպես պատերազմական, այնպես էլ խաղաղ պայմաններում զինված ուժերի կենսագործունեության արդյունավետության ապահովման գործում ռազմական հոգեբանության առանձնահահատուկ կիրառական դերով: «Ռազմական հոգեբանություն»-ն ակտիվորեն յուրացնում է գիտելիքի նոր ոլորտներ պատերազմի և մարտի, մարտական սթրես-գործոնների, զորքերի հոգեբանական կայունության, զինծառայողների մարտական և հոգեբանական պատրաստության օրինաչափությունների, մարտական գործողությունների մասնակիցների հոգեբանական աջակցության և վերականգնման (ռեաբիլիտացիայի) տեխնոլոգիաների, հավատի և սնահավատությունների, հակառակորդի հետ տեղեկատվական հոգեբանական հակամարտության մեթոդների մասին»:

Ռազմական հոգեբանը վստահեցրեց՝ գիտաժողովը գործնական ևս մեկ քայլ էր ոլորտի գիտական հետազոտությունների արդյունքները ՀՀ զինված ուժերում ներդնելու և ռազմական հոգեբանի ինստիտուտի զարգացման ուղղությամբ:

Ի դեպ, Մանկավարժական համալսարանի ներկայացուցիչները գիտաժողովի ընթացքում հանդես եկան նաև կոնկրետ գործնական առաջարկություններով, որոնք կարևորվեցին նաև Պաշտպանության նախարար Սեյրան Օհանյանի կողմից. գիտաժողովի անդամներին հանձնարարվեց կազմել միջոցառումների ծրագիր և աշխատանքները տեղափոխել առավել գործնական

փուլ: