ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

«Արամ Խաչատրյան» համերգասրահում մեծ շուքով տեղի ունեցավ Հայկական պետական մանկավարժական համալսարանի «Լավագույն ուսանող» մրցանակաբաշխությունը։

Մայր աթոռ Սուրբ Էջմիածնի քրիստոնեական դաստիարակության կենտրոնի տնօրեն Հայր Վարդան վարդապետ Նավասարդյանը շնորհավորեց լավագույններին և մեծ պատասխանատվություն համարեց օրինակելի, լավ ուսանող լինելու պարտականությունը. «Դուք Խաչատուր Աբովյանի լուսավորչության շարունակողներն եք, նրա լույսի կրողներն ու տարածողները:

Իմացականության լույսը պետք է թափանցի ձեր հոգու մեջ, գիտելիքն ու կրթությունը, որը ստանում եք կրթական հարուստ ավանդույթներ ունեցող այս հաստատությունում, պետք է պատասխանատվությամբ կրեք ձեր ուսերին` դառնալով լավագույներից լավագույնը` մեր ազգի նորոգության, պայծառության և բարգավաճման մեծ առաքելության մեջ»:

Մանկավարժական համալսարանի Ուսանողական խորհրդի նախագահ Ներսիկ Մարգարյանը նշեց, որ «Լավագույն ուսանող»-ի ընտրությունը տեղի է ունենում ըստ հաստատված կանոնակարգի, և հիմք են ընդունվում մի շարք չափանիշներ՝ առաջադիմություն, հասարակական ակտիվություն և այլն։

Հայաստանի երիտասարդական հիմնադրամի հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանը Ֆակուլտետային 10 լավագույն ուսանողներին պարգևատրեց նոութբուքերով:

Կարեն Ավագյանը, կարևորելով մրցանակաբաշխությունը, նշեց. «Դրանց նպատակն է ուսանողներին ցույց տալ, որ գիտելիքը, բարձր առաջադիմությունը խրախուսվում է։ Ուսանողը պետք է համոզված լինի, որ ինքն իր ուժերով կարող է հասնել նվաճումների, և նրա գիտելիքը կարող է գնահատվել տարբեր բնագավառներում: Հայաստանի երիտասարդական հիմնադրամն ամեն ինչ անում է, որպեսզի նման ծրագրերն առավել հաճախակի լինեն»:

Կարեն Ավագյանը նկատեց` գերազանց առաջադիմությամբ և ակտիվությամբ հատկապես առանձնանում են աղջիկները, ընդ որում, Մանկավարժական համալսարանի 10 ֆակուլտետներում էլ լավագույնի կոչմանն այս տարի ներկայացված էին հենց իգական սեռի ներկայացուցիչները:

10 ֆակուլտետային լավագույն ուսանողներից բուհի «Լավագույն ուսանող»-ի կոչմանն այս տարի արժանացավ Հատուկ կրթության ֆակուլտետի ուսանողուհի Ասյա Հակոբյանը, ով իր ամառային 8-օրյա հանգիստը կանցկացնի Իտալիայում:

«Լավագույնը ճանաչվելու համար ոչ մի գաղտնիք գոյություն չունի, պարզապես պետք է լավ սովորել ու հավատալ սեփական ուժերին: Սա ևս մեկ հաջողություն էր, արված մեկ քայլ` իմ նվիրական երազանքներին ու նպատակներին հասնելու ճանապարհին: Ես հաղթահարեցի ևս մեկ աստիճան »,- armspu.am-ի հետ զրույցում նշեց «Լավագույն ուսանող» ճանաչված Ասյա Հակոբյանը։

Հայաստանի երիտասարդական հիմնադրամի և ՀՊՄՀ Ուսանողական խորհրդի կազմակերպած միջոցառումը շարունակվեց տոնական համերգով, որի ընթացքում Էմմա Պետրոսյանը, Անուշիկ Ալավերդյանը, Վարդան Բադալյանը, Սոնա Շահգելյդյանը, Գոռ Սուջյանը, Սևակ Ամրոյանը, Մոնիկա Մանուչարովան, Միհրան Ծառուկյանը, Սոնա Ռուբենյանը ներկայացրին սիրված և հայտնի երգեր: