Մանկավարժական համալսարանի թանգարանը մեկ տարեկան է. հիմնադրման մեկամյա գործունեության առթիվ բուհը հյուրընկալել էր թանգարանի այն բարեկամներին, որոնք մեծ
ներդրումն են ունեցել թանգարանի հավաքածուն արժեքավոր նյութերով համալրելու գործում:
Ուսումնագիտական գծով պրոռեկտոր Սրբուհի Գևորգյանը բուհի ռեկտորի անունից շնորհակալագրեր հանձնեց Ցոլակ Սիմոնյանին, Կարեն Շավարշյանին, Միսաք Մելքոնյանին, Ջուլիետա Ղարիբյանին, Հեղինե Մելիք-Վրդանեսյանին, Իսկուհի Լափայանին, Մարի Մարգարյանին, Արմինե Սարգսյանին, Դավիթ Հովհաննիսյանին:
Պրոռեկտորն ուրախությամբ նկատեց` բուհի թանգարանը ստեղծման օրից եղել է գիտահետազոտական, գիտաուսումնական, գիտամեթոդական կենտրոն, որը պարբերաբար թարմացրել և արդիականացրել է թանգարանային ֆոնդը:
Թանգարանի տնօրեն Ալվարդ Գրիգորյանը հյուրերին ներկայացրեց և ամփոփեց տարվա ընթաքում կատարած աշխատանքները, ունեցած ձեռքբերումները, ապա ծանոթացրեց թարմացված նյութերին:
Տնօրենն ուրախությամբ նշեց`բուհի թանգարանում այսուհետ իր պատվավոր տեղը կունենա նաև Մանկավարժական ինստիտուտի առաջին ռեկտոր, մանկավարժ, պրոֆեսոր Արշավիր Շավարշյանը. վերջինիս կիսանդրին օրերս բուհին է նվիրել Գեղարվեստական կրթության ֆակուլտետի դասախոս Միսաք Մելքոնյանը, որը հեղինակել եւ համալսարանին է նվիրել նաեւ Հրաչյա Աճառյանի եւ Մանուկ Աբեղյանի կիսանդրիները, ինչպես նաեւ նրա ղեկավարությամբ ուսանողի կատարած դիպլոմային աշխատանքը՝ Մանկավարժական համալսարանի անվանի շրջանավարտ, ազգային հերոս Մովսես Գորգիսյանի դիմաքանդակը:
Հյուրերն իրենց շնորհակալական խոսքն ուղղեցին թանգարանին և խոստացան` նյութերի հետագա համալրման գործում ևս ակտիվ մասնակցություն ունենալ:
Թանգարանի հիմնադրմանը նվիրված միջոցառումը շարունակվեց առաջին ռեկտոր Արշվիր Շավարշյանին և Մանկավարժության ամբիոնի առաջին դեկան Գուրգեն Էդիլյանին նվիրված դասախոսությամբ:
Մանկավարժության տեսության և պատմության ամբիոնի նախաձեռնությամբ կազմակերպված միջոցառման ընթացքում բուհի ուսանողները ներկայացրին մանկավարժության երկու նվիրյալների կենսագրական տվյալները, կյանքն ու մասնագիտական գործունեությունը:
Հիշեցնենք, որ բուհի պատմության ժամանակագրությունը` հիմնադրումից մինչև մեր օրերը ներկայացնող Մանկավարժական համալսարանի եռաչափ լուծումներով թանգարանի հանդիսավոր բացումը տեղի ունեցավ անցած տարի` նոյեմբերի 19-ին` բուհի հիմնադրման 90-ամյակին ընդառաջ:
.jpg)
.jpg)
