ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Մանկավարժական համալսարանում կայացավ Գիտական խորհրդի հերթական նիստը.նիստի անդամները մեկ րոպե լռությամբ հարգեցին խորհրդի երկարամյա անդամ, Հայոց պատմության ամբիոնի վարիչ, պրոֆեսոր Մհեր Կարապետյանի հիշատակը:

Հեռանկարային ծրագրերի մշակման և մշտադիտարկման վարչության պետ Ռիտա Գևորգյանն ու Կրթության որակի և հեռակա ուսուցման գծով պրոռեկտոր Տիգրան Այվազյանը ներկայացրին խորհրդի առանցքային` Համալսարանի գործունեության ռազմավարական ծրագրի իրականացման մասին հարցը:

Ի դեպ, Գիտական խորհրդի նիստին ներկա էր նաև Որակի ապահովման ազգային կենտրոնի տնօրեն Ռուբեն Թոփչյանը:

Ռիտա Գևորգյանը նկատեց, թեև ռազմավարական ծրագրի վերանայված տարբերակում պահպանվել են համալսարանի զարգացման ռազմավարության հիմնական ուղենիշները, առաքելությունը, ՀՀ կայուն զարգացման գերակայությունները, ՀՀ կրթության զարգացման 2011-2015թթ. պետական ծրագրի նպատակադրումները, ինչպես նաև «Մասնագիտական կրթության որակի ապահովման ազգային կենտրոն» հիմնադրամի կողմից հավատարմագրման գործընթացին ներկայացված հիմնական պահանջներն ու չափանիշները, այնուամենայնիվ կատարվել են նաև մի շարք փոփոխություններ:

Հեռանկարային ծրագրերի մշակման և մշտադիտարկման վարչության պետն ընդգծեց, որ արտաքին և ներքին շահակիցների նկատառումներն ու առաջարկություններն ամփոփելով` ձևակերպվել են համալսարանի մնայուն արժեքները, առաջադրվել են համալսարանի գործունեության հիմնական բնագավառներն արտացոլող, նորովի ձևակերպված 10 նպատակներ, ռազմավարական պլանում առաջին անգամ յուրաքանչյուր նպատակի համար տրվել են առաջընթացի գնահատման չափելի ցուցանիշներ, մշակվել է նաև ռազմավարական նպատակների իրականացման պլան- ժամանակացույցը:

Կրթության որակի և հեռակա ուսուցման գծով պրոռեկտոր Տիգրան Այվազյանը Համալսարանի գործունեության ռազմավարական ծրագրի իրականացման մասին զեկույցում մանրամասն ներկայացրեց 2011-2015 թվականների համալսարանի զարգացման ռազմավարական նպատակները, առկա խնդիրներն ու զառմավարության ուղղությունները:

Պրոռեկտորը ռազմավարական ծրագրում առկա 10 հիմնական նպատակների միջոցով ներկայացրեց 2011-2013 թվականներին արված աշխատանքն ու առաջիկա անելիքների տեսլականը.այն արժանացավ ներկաների հավանությանը:

Համալսարանի ֆակուլտետների և համահամալսարանական ամբիոնների կանոնադրությունների մասին հարցը ներկայացրեց պրոռեկտոր Արա Երեմյանը:

Պրոռկտոր հավաստիացրեց` կանոնադրությունների մշակման ընթացքում հաշվի են առնվել գիտակրթական գործունեության կառավարմանը վերաբերող օրենքներն ու այլ իրավական ակտերը, ներառյալ` Համալսարանի կանոնադրության բովանդակությունը, գաղափարախոսությունը, սկզբունքները, դրույթները: Գիտական խորհուրդը հաստատեց կանոնադրությունների նախագծերը:

Պրոռեկտոր Սրբուհի Գևորգյանի ներկայացմամբ՝ գիտխորհրդի անդամները հաստատեցին գիտական 7 թեմաներ, ինչպես նաև ներկայացված ուսումնական ձեռնարկների տպագրությունը:

Նիստի ընթացքում խորհրդի անդամները հաստատեցին Կենսաբանության, քիմիայի և աշխարհագրության, ինչպես նաև Օտար լեզուների ֆակուլտետների դեկանների ներկայացրած ուսանողական կրթաթոշակները: Խորհուրդը որոշեց` կանոնակարգով սահմանաված յուրաքանչյուր անվանական կրթաթոշակ հատկացնել ընդամենը մեկ ուսանողի:

Գիտխորհուրդն ընդունեց նաև Հատուկ կրթության ֆակուլտետի դեկան Արմինե Ավագյանի առաջարկը, որ ֆակուլտետի մագիստրոսական կրթական համակարգում հատուկ կրթության մանկավարժություն և հոգաբանություն մասնագիտության մեջ ներդրվի «էրգոթերապիա» մասնագիտացումը:

Նիստի ավարտին փակ գաղտնի քվեարկությամբ ընտրվեցին համալսարանի գիտական` 7 դոցենտի և 3 պրոֆեսորի կոչումների ներկայացված բոլոր 10 թեկնածուները, իսկ համալսարանի ռեկտոր Ռուբեն Միրզախանյանը շնորհավորեց ամսվա հոբելյարներին: