ՀՀ վարչապետ, Մանկավարժական համալսարանի Կառավարման խորհրդի նախագահ Տիգրան Սարգսյանն այսօր «Թեքեյան մշակութային կենտրոն»-ում հանդիպեց Ռուսաց
լեզվի կենտրոններում վերապատրաստում անցած ուսուցիչներին:
Կառավարության ղեկավարը կարևորեց ռուսաց լեզվի ուսուցիչների վերապատրասման գործընթացը՝ այն համարելով դպրոցներում առարկայի իմացությունը բարձրացնելու լավ հնարավորություն:
«Օտար լեզուների իմացությունն էականորեն բարձրացնում է պետական ապարատի աշխատակիցների արտադրողականությունը. դրան հակառակ՝ մեկ լեզի տիրապետող մարդն իր գործունեության ընթացքում ունենում է լուրջ խնդիրներ»,-ասաց Տիգրան Սարգսյանը և հավելեց՝ օտար լեզվի դասավանդումը պետք է լինի առաջնահերթություն:
Անդրադառնալով դասավանդման նորագույն մեթոդներին և ռուսաց լեզվի իմացության մակարդակի բարձրացմանը՝ վարչապետը կարևորեց Մանկավարժական համալսարանի դերը՝ նկատելով՝ բուհն իր ուսումնական ծրագրերում սկսել է մեծ ուշադրություն դարձնել օտար լեզուների ուսուցմանը:
«Մենք գիտակցում ենք ռուսերենի ուսուցիչներ պատրաստելու գործում Մանկավարժական համալսարանի առաքելությունը, սակայն տարբեր ոլորտներում օտար լեզուների իմացության կարևորումը նպաստեց, որ երկու տարի առաջ բուհի բոլոր ֆակուլտետներում 4 անգամ ավելացվեցին օտար լեզուների դասաժամերը»,-ասաց Մանկավարժական համալսարանի ռեկտոր Ռուբեն Միրզախանյանը՝ նկատելով, որ 70 տարի նույն՝ Խորհրդային Միության կազմում լինելը ամրապնդել է Հայաստանի և Ռուսաստանի պատմական, քաղաքական և մշակութային կապերը:
Անդրադառնալով հայ մտավորականության այն անհագստությանը, թե գնալով մայրենին իր տեղը զիջում է օտար լեզուներին, Ռուբեն Միրզախանյանը վստահեցրեց՝ ռուսերենի ուսուցումը ոչ թե մայրենիի հաշվին է, այլ հանուն մայրենիի:
Նշենք, որ Մոսկվայի Պուշկինի անվան լեզվաբանության ինստիտուտի մասնագետները Ռուսաց լեզվի կենտրոններում վերապատրաստել են հանրապետության մարզերի 137 ուսուցիչների. նրանցից մի քանիսի վկայականները հանձնեց անձամբ վարչապետ Տիգրան Սարգսյանը:
