ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Օրերս Կուլտուրայի ֆակուլտետում կայացավ ՀՊՄՀ Ուսանողական խորհրդի ընդհանուր ժողովը: ՈւԽ նախագահ Ներսիկ Մարգարյանը ողջունեց ուսանողներին, ապա ներկայացրեց ընթացիկ տարում կատարված աշխատանքները, խոսեց նվաճումների ու ձեռքբերումների մասին:

Ներսիկ Մարգարյանն առանձնապես կարևորեց ՀՀ կրթության և գիտության նախարար Արմեն Աշոտյանից ստացած հուշամեդալը, առաջին կուրսի ուսանողների` լողի դասընթացների հաճախելը, բուհի պարային խմբի Լիտվա կատարած այցն ու Ուսանողական խորհրդի կայքէջի ստեղծումը:

Նիստի ընթացքում տեղի ունեցան ընտրություններ. Ուսանողական խորհրդի Որակի ապահովման գծով օգնական առաջադրվեց և ընտրվեց Մաթեմատիկայի, ֆիզիկայի և ինֆորմատիկայի ֆակուլտետի մագիստրատրոս Էդիկ Գուլյանը:

Ուսանողական կառույցի ներքին աշխատանքների համակարգող առաջադրվեց և ընտրվեց Կրթության հոգեբանության և սոցիոլագիայի ֆակուլտետի մագիստրատրոս Վրեժ Ղազարյանը:

Բանավեճ, ինտելեկտուալ խաղեր, լող, տղաների և աղջիկների վոլեյբոլ և բասկետբոլ, շախմատ, ֆուտբոլ. ինտելեկտուալ և սպորտային խաղերին մասնակցած շուրջ 130 ուսանողի Ներսիկ Մարգարյանը հանձնեց պատվոգրեր և հաղթական գավաթներ:

Ֆուտբոլի առաջնությունում հաղթած ուսանողներին պատվոգրեր և մեդալներ հանձնեց Շախմատի և սպորտի ամբիոնի վարիչի տեղակալ Սուրեն Բարսեղյանը:

Ի դեպ, ֆուտբոլի աղջիկների առաջնությունում հաղթած ուսանողները Մանկավարժական համալսարանի ռեկտորատի կողմից ստացել էին նաև դրամական պարգևներ:

Պատվոգրերի հանձման արարողությունից հետո ՈւԽ նախագահ Ներսիկ Մարգարյանն ու փոխնախագահ Դավիթ Ալեքսանյանը հատուկ մրցանակներ հանձնեցին մի շարք անվանակարգերում:

ՀՊՄՀ ՈւԽ-ում երկար տարիներ ծավալած գործունեության և ներդրած մեծ ավանդի համար պարգևատրվեցին Տիգրան Կարապետյանը, Լուսինե Փիրոյանը, Վարազդատ Եղիազարյանը, Աստղիկ Շահվերդյանը: «Լավագույն հանձնաժողով» ճանաչվեց Շախմատի, սպորտի և առողջ ապրելակերտի հանձնաժողովը, «Լավագույն ակումբ» անվանակարգում` Ինտելեկտուալ հանձնաժողովն էր, «Լավագույն ֆակուլտետային ուսանողական խորհուրդ»-ը Գեղարվեստական կրթության ֆակուլտետի ՈՒԽ-ն էր, իսկ «Լավագուն ուսանողական խորհրդի նախագահ» տիտղոսին արժանացավ Պատմության և իրավագիտության ֆակուլտետի ՈՒԽ նախագահ Տիգրան Խաչատրյանը:

ՈւԽ ժողովին հաջորդեց տոնական համերգային միջոցառումը. Մանկավարժական համալսարանի տարբեր ֆակուլտետների շնորհալի ուսանողներն իրենց երգով, պարով ու ասմունքով շնորհավորեցին բոլոր մրցանակակիրներին:

Անակնկալներով լի տոնական երեկոն շարունակվեց բուհի շուրջ 600 ուսանողների մասնակցությամբ: Սա ևս մեկ նախաձեռնություն էր, որով ՀՊՄՀ Ուսանողական խորհուրդը փորձեց առավել հետաքրքիր և հաճելի դարձնել ուսանողների առօրյան` խոստանալով, որ դրանք կլինեն շարունակական: