Մեկնարկեց Տեմպուսի «ԱՐՄԵՆՔԱ» ծրագիրը

07.02.2014

Փետրվարի 2-3-ը Շվեդիայի Լինշոպինգ քաղաքում մեկնարկեց Տեմպուսի «ԱՐՄԵՆՔԱ» (Հայաստանում որակավորումների ազգային և սեկտորիալ շրջանակների իրագործումը) ծրագիրը:

Այն միտված է Հայաստանում Ազգային և 5 սեկտորիալ որակավորումների շրջանակները ազգային և ինստիտուցիոնալ մակարդակներում գործարկելուն:

Ծրագիրը Հայաստանում իրականցվում է հայաստանյան համակարգողներ Հայկական պետական մանկավարժական և Երևանի պետական համալսարանների ջանքերով: Ծրագրին աջակցում է ՀՀ կրթության և գիտության նախարարությունը:

Տեմպուսի «ԱՐՄԵՆՔԱ» ծրագիրը հնարավորություն է ընձեռում համադրելի դարձնել ՀՀ որակավորումները եվրոպականին, ինչպես նաև դյուրացնել որակավորումների ճանաչումն ու ընկալումը թե՛ բուհերի, թե՛ աշխատաշուկայի կողմից:

Ծրագրին մասնակցում էին Հայաստանի 15 գործընկերներ, իսկ եվրոպական հաստատություններից 6 ներկայացուցիչ:

Մանկավարժական համալսարանից ծրագրին մասնակցում էին բուհի Աշխատակազմի և միջազգայնացման գծով պրոռեկտոր Արա Երեմյանը, Միջազգային համագործակցության բաժնի ղեկավար Քրիստինա Ծատուրյանը:

Հանդիպման ընթացքում ներկայացվեց ծրագրի կառուցվածքը, մասնակից հաստատությունների գործառույթները, ծրագրով նախատեսված գործողություններն ու վերջնաժամկետները:

Հանդիպման ընթացքում եվրոպացի գործընկերները ներկայացրին որակավորումների շրջանակների ներդրման եվրոպական փորձը:

Ստորև ներկայացվում է ծրագրի համագործակից ուսումնական հաստատությունների ցանկը.

► Խ. Աբովյանի անվան հայկական պետական մանկավարժական համալսարան

► Երևանի պետական համալսարան

► Հայաստանի ազգային ագրարային համալսարան

► Մ. Նալբանդյանի անվան Գյումրիի պետական մանկավարժական ինստիտուտ

► Բրյուսովի անվան Երևանի պետական լեզվաբանական համալսարան

► Երևանի ճարտարապետության և շինարարության պետական համալսարան

► Ռուս-հայկական (սլավոնական) համալսարան

► Գավառի պետական համալսարան

► ՀՀ Կրթության և գիտության նախարարություն

► Ակադեմիական փոխճանաչման և շարժունության ազգային տեղեկատվական կենտրոն