ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Այսօր Մանկավարժական համալսարանի Ուսանողական խորհրդի նախագահ Ներսիկ Մարգարյանը բուհի 10 ֆակուլտետների առկա ուսուցման համակարգում սովորող 145 ուսանողների Հայաստանի երիտասարդական հիմնադրամի կողմից հանձնեց հավաստագրեր:

ՀՀ կառավարության աջակցությամբ հիմնադրամի հայտարարած կրթաթոշակի տրամադրման մրցույթին արժանացան բարձր առաջադիմություն, հասարակական ակտիվություն ցուցաբերած, սոցիալապես անապահով և սահմանամերձ շրջանների 1-ին կուրսի անվճար համակարգում չընդգրկված ուսանողները:

Ի դեպ, նրանց 2013-2014 ուսումնական տարվա վարձավճարները կզեղչվեն 80 հազար դրամով:

ՈւԽ նախագահ Ներսիկ Մարգարյանը, ողջունելով և շնորհավորելով կրթաթոշակի արժանացածներին, նկատեց՝ սա մի ծրագիրը է, որը օգնում է լուծել ուսանողների սոցիալական խնդիրներն ու խթանել նրանց առաջադիմության բարձրացմանը. «Մանկավարժական համալսարանում շարունակվում է հավատարմագրման գործընթացը.այս ընթացքում փոփոխության են ենթարկվել բուհական կրթության որակն ու կրթական գործընթացը: Պատահական չէ, որ Մանկավարժականը մասնակից բուհերից առաջին էր, թե´ մասնակցության ակտիվությամբ, թե´ կրթաթոշակ ստացածների թվով. ի տարբերություն նախորդ տարվա 104 ուսանողի` այս տարի ծրագրին մասնակցելու հայտ էր ներկայացրել 259, ինչը պայմանավորված է նաև ՈւԽ-ի` ուսանողների առավել լայն շրջանակին իրազեկելու հանգամանքով»:

Ներսիկ Մարգարյանը կատարված փոփոխությունների շարքում հիշեցրեց, որ բուհի 1-ին կուրսեցիներն այս տարվանից ֆիզիկական կուլտուրայի պարապմունքներին մասնակցում են մանկավարժական համալսարանի տրամադրած համազգեստով. նրանք նաև օգտվում են անվճար լողավազան հաճախելու հնարավորությունից. «Այս ամենը միտված է ձեր ուսումնական առօրյան առավել հագեցած և հետաքրքիր դարձնելուն, իսկ կրթաթոշակի տրամադրումը փաստում է, որ 21-րդ դարի ուսանողը պետք է զինված լինի հարուստ գիտելիքներով»:

ՈւԽ նախագահի հետ միակարծիք է նաև Գեղարվեստական կրթության ֆակուլտետեի «Հագուստի դիզայն» բաժնի 1-ին կուրսի ուսանողուհի Վարդուհի Բարսեղյանը: Նա կրթաթոշակ ստանալու մեծ հույսեր չուներ, սակայն նկատում է, որ վարձի փոքր-ինչ զեղչումն անգամ` կարևոր է յուրաքանչյուր ուսանողի համար:

Կրթության հոգեբանության ֆակուլտետի «Սոցիալական աշխատանք» բաժնի ուսանողուհի Անի Առաքելյանն էլ նկատում է` թեպետ գումարի կարիք առանձնապես չուներ, բայց ուրախ է, որ մեր օրերում գիտելիքը գնահատվում է, իսկ բարձր առաջադիմությունը` օգնում կրճատել ուսման վարձը: