ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Հանդիպումը սկսվեց Տերունական աղոթքով, որից հետո հոգևորականներն ուսանողներին ներկայացրին Մեծ Պահքի նշանակությունը, ապաշխարության և աղոթքների խորհուրդը:

Խոսելով Մեծ Պահքի մասին` Գեղամ սարկավագը նկատեց` այն նպաստում է մարդու մարմնի և հոգու մաքրմանը, թուլությունների հաղթահարմանն ու մարդկային կամքի ամրապնդմանը:

Հանդիպման ընթացքում անդրադարձ եղավ նաև Պահքի շրջանում օգտագործվող սննդի, անհրաժեշտ աղոթքների և մարդու վարվելակերպին. «Յուրաքանչյուր քրիստոնյայի համար անհրաժեշտություն է իր մտքում և սրտում ունենալ Տերունական այս կենսատու խորհուրդները:

Գիտակցելով և ապրելով քրիստոնեական եկեղեցու հայրերի կողմից սահմանված կանոններով և պատգամներով` բարի ընթացք ենք հարթում մեզ համար: Աստծուն ապավինելով` ավելի հեշտ ենք հաղթահարում կյանքում հանդիպող խոչընդոտներն ու դժվարությունները»,- ուսանողների հետ զրույցում նշեց Գևորգ սարկավագը:

Ուսանողները մի շարք հարցեր ուղղեցին հյուրերին և հետաքրքրվեցին Հայաստանում գործող քայքայիչ աղանդավորական շարժումների մասին: Գեղամ սարկավագը մանրամասնեց Հայ առաքելական եկեղեցու ձեռնարկած միջոցառումները, որոնք, ըստ հոգևորականի, կնպաստեն եկեղեցու շուրջ ժողովրդի համախմբմանը:

Հանդիպման վերջում Պատմության և իրավագիտության ֆակուլտետի դեկանի օգնական, ՈւԽ նախագահ Տիգրան Խաչատրյանը շնորհակալություն հայտնեց հոգևորականներին և կարևորելով նման հանդիպումները` դրանք որակեց եկեղեցի-համալսարան կապի զարգացմանը, ուսանողների հոգևոր գիտելիքների ավելացմանը միտված գործընթաց. «Տեղեկատվական ցանցակենտրոն պատերազմների հորձանուտում գտնվող հասարակության համար չափազանց կարևոր է դիմագրավել ներկայիս մարտահրավերներին և համախմբվել դարեր շարունակ հայ ժողովիրդի պահապան հանդիսացող Հայ Առաքելական եկեղեցու շուրջ»,-հավելեց նա: