Արդեն ձևավորված ավանդույթ է, որ Մանկավարժական համալսարանի ուսանողները Մայր Աթոռ Սուրբ Էջմիածնում հյուրընկալվում են Ն.Ս.Օ.Տ.Տ. Գարեգին
Բ Ամենայն Հայոց Կաթողիկոսին.այսօր «Վաչե և Թամար Մանուկյաններ» Մատենադարանում Վեհափառը հանդիպեց Պատմության և իրավագիտության ֆակուլտետի մագիստրատուրայի 2-րդ կուրսի ուսանողներին:
ՀՊՄՀ ռեկտոր Ռուբեն Միրզախանյանը շնորհակալություն հայտնեց Կաթողիկոսին հյուրընկալության համար՝ նշելով, որ պատմաբանների նոր սերունդը դպրոցներում դասավանդելու է ինչպես հայ ազգի, այնպես էլ հայ եկեղեցու պատմությունը. ապագա գործունեության իրականացման ճանապարհին այս հանդիպումը Հայրապետի օրհնանքը, պատգամներն ու խրատներն ստանալու բացառիկ հնարավորություն է:
Վեհափառը շնորհավորեց ներկա աղջիկներին նախօրեի՝ մայրության և գեղեցկության տոնի առթիվ և մաղթեց, որ Աստված նրանց շնորհի մայրական առաքելության զգացում և շնորհազարդի երկնապարգև այն շնորհներով, որոնք կգեղեցկացնեն նրանց կյանքը:
Կաթողիկոսը բարձր գնահատեց ՀՊՄՀ ռեկտորի՝ ապագա մանկավարժներին պարբերաբար Էջմիածին ուղղորդելու նպատակաուղղվածությունը՝ նշելով. «Ձեզնից շատերը շուտով մուտք են գործելու դպրոց՝ իրականացնելու մասնագիտական առաքելությունը: Հորդորում եմ հավատարիմ մնալ ձեր կոչմանը և ազգային դպրոցին մատուցել այնպիսի ծառայություն, որ ունենանք առավել գիտակ և ազնիվ սերունդ:Մեր վաղվա օրը խարսխվում է անցյալի պատմությամբ. ձեր քայլերն ուղղեք դեպի պատմության լույս, որ միշտ պայծառ շողարձակել է շնորհիվ հայ պատմաբանների»:
Վեհափառն ապագա պատմաբաններին հիշեցրեց, որ նրանց ուսերին մեծ պատասխանատվություն է դրված, քանի որ պատմության ուսուցումն է ձևավորում սերունդների գիտակցությունը. «Իր ազգի պատմությանը քաջատեղյակ մարդն ավելի մեծ պատասխանատվությամբ է վերաբերվում ներկային՝ ակամայից դառնալով առավել հպարտ քաղաքացի:Դուք անհատի կենսագրությանը զուգահեռ մատուցում եք ազգի պատմությունը. այդ իմաստով պատմաբանն առավել պատասխանատու է դառնում իր երկրի և ժողովրդի հանդեպ՝ նրանց հաղորդակից դարձնելով ազգի դարավոր իղձերին և երազանքներին»:
Ամենայն Հայոց Կաթողիկոսն ընդգծեց նաև ժողովրդի բազմադարյան պատմության ընթացքում քրիստոնեության կարևորագույն դերն ու նշանակությունը՝ մատնանշելով վերջին շրջանում տարածված և ազգային կյանքում քրիստոնեական հավատքի դերը կասկածի տակ դնող արտահայտությունները. «Կյանքի ընթացքը դեպի հավերժություն պայմանավորված է հավատքով և Փրկչի վարդապետության հանդեպ հավատարմությամբ:
Միշտ հիշեք՝ հավատքն ու եկեղեցին անբաժան են պատմությունից»,-ասաց Վեհափառը և ևս մեկ անգամ վստահեցրեց՝ եկեղեցին յուրաքանչյուրի տունն է, իսկ եկեղեցականները՝ հոգևոր ծնողներ:Հանդիպման ընթացքում ուսանողներն Ն.Ս.Օ.Տ.Տ. Գարեգին Բ-ին ուղղեցին իրենց հետաքրքրող բազմապիսի հարցեր՝ եկեղեցու վերաբերմունքը բողոքական եկեղեցիների, կրոնափոխված հայերի, Վրաստանի Հանրապետության հակահայ քաղաքականության, ինչպես նաև քեսաբահայությանը օգնություն ցուցաբերելու վերաբերյալ:
Այցի ընթացքում ուսանողներն այցելեցին նաև Սուրբ Էջմիածնի մայր տաճար և Ռուբեն Սևակի անվան նորաբաց թանգարան:
