ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Մանկավարժական համալսարանում կայացավ Գիտական խորհրդի ընթացիկ ուսումնական տարվա վերջին նիստը. բուհի ռեկտոր Ռուբեն Միրզախանյանը, ավանդույթի համաձայն, շնորհավորեց ամսվա հոբելյարներին, ապա հանձնեց 6 պրոֆեսորի և 11 դոցենտի գիտական կոչումներ:

 

Գիտական խորհրդի օրակարգի առաջին հարցի՝ Ուսումնական աշխատանքների ծավալների հաշվարկի չափորոշիչների մասին զեկուցեց Ուսումնամեթոդական վարչության պետ, պրոռեկտոր Մհեր Մելիք- Բախշյանը:

 

 

Վերջինս իր ելույթում նկատեց, որ ուսումնական պլանների, գնահատման և մանկավարժական նոր պրակտիկայի համակարգի անցումն անհրաժեշտություն է առաջացրել վերանայելու ուսումանական աշխատանքների ծավալների հաշվարկի չափորոշիչները. վերանայվել են նաև դասախոսների ծանրաբեռնվածության ծավալը.«Եթե նախկինում ամբիոնի (տեսական) ժամերի 50%-ից ավելին գերակշռում էր մասնագիտական դասախոսությունների ժամերը, ապա այն ամբիոնները, որոնց բեռնվածությունում գերակշռում էր գործնական, սեմինար, լաբորատոր և անհատական ժամերը, հաշվարկվում էր մեկ այլ սանդղակով»,-նշեց պրոռեկտորն ու առաջարկեց՝ այսուհետ բոլոր ամբիոնների ծանրաբեռնվածությունը հաշվարկել մեկ ընդհանուր սանդղակով՝ ավելացնելով նաև գրավոր աշխատանքների ստուգմանն ու մագիստրոսական թեզերի գրախոսմանը հատկացվող ժամաքանակը:

 

Ամփոփիչ ատեստավորման ավարտական քննությունների արդյունքների մասին զեկուցեցին ՀՊՄՀ Կրթության որակի և հեռակա ուսուցման գծով պրոռեկտոր Տիգրան Այվազյանն ու Ուսումնամեթոդական վարչության պետ, պրոռեկտոր Մհեր Մելիք- Բախշյանը:

 

Պրոռեկտորները, ամփոփելով նախագահների հաշվետվություններն ու կատարված դիտարկումները, ներկայացրին ամփոփիչ ատեստավորման ավարտական քննությունների դրական կողմերը, թերացումները՝ համեմատականներ անցկացնելով նախորդ տարիների հետ:

 

«Ավարտական աշխատանքները հիմնականում աչքի են ընկել արդիականությամբ և որոշակի ինքնուրույնությամբ, ուսանողներին մեծապես օգնել է քննասենյակում տեղեկատվական գրականության առկայությունը, գիտահետազոտական ինստիտուտների հետ կապի ընդլայնման արդյունքում մագիստրոսական թեզերը մեծամասամբ կրել են գիտական բնույթ, բարձր է շրջանավարտների մասնագիտական գիտելիքները, սակայն թերացում է նկատվել մանկավարժության և մեթոդիկայի հարցերին պատասխանելիս»,-նկատեցին նրանք:

 

Պրոռեկտորները նշեցին նաև, որ դիպլոմային աշխատանքներն ու մագիստրոսական թեզերն ունեն կառուցվածքային թերացումներ. ավարտական աշխատանքների և մագիստրոսական թեզերի ղեկավարների և գրախոսների կարծիքները շատ հաճախ կրում են ձևական բնույթ, թույլ է արտահայտված շրջանավարտների ինքնուրույն և վերլուծական կարողությունները, ուսանողների զգալի մասը դրսևորում է բանավոր և գրավոր խոսքի ցածր մշակույթ:

 

Գիտական խորհրդում ներկայացրին նաև առաջարկներ. մասնավորապես՝ առաջարկվեց հանձնաժողովների նախագահներին հաշվետվությունները գրելիս հավասարապես նշել դրականը և բացասական կողմերը, արված առաջարկություններն ու դիտողությունները քննարկել ֆակուլտետների խորհուրդներում և ամբիոնների նիստերում, հաշվի առնել մագիստրոսական թեզերի ղեկավարների և ընդիմախոսների ընտրությունը, խրախուսել շրջանավարտների կողմից տեխնիկական միջոցների օգտագործումը. որոշումն ընդունվեց միաձայն:

 

 

 

Գիտական խորհրդին կից մշտական հանձնաժողովների նախագահներ Սրբուհի Գևորգյանը, Աելիտա Դոլուխանյանը, Մեժլում Երիցյանը հանդես եկան 2013-2014 ուսումանական տարվա հաշվետությամբ՝ ներկայացնելով հանձնաժողովների կատարած աշխատանքները:

 

Կրթության բարեփոխումների և որակի վարչության պետ Մկրտիչ Ավագյանը Գիտական խորհրդի անդամներին զեկուցեց բուհում ուսանողների գիտելիքների ստուգման և գնահատման համակարգի ներդրման վերաբերյալ.«Մասնագիտական կրթության որակի ապահովման ազգային կենտրոն հիմնադրամի փորձագիտական խմբի կողմից Մանկավարժական համալսարանում անցկացվել է ինքնավերլուծության, կրթական և որակի ապահովման գործընթացների իրականացման արտաքին գնահատում իրականացնող 3 չափանիշներում՝ ուսումնառողներ, պրոֆեսորադասախոսական կազմ և մասնագիտական կրթական ծրագրեր: Արդյունքում՝ ՀՊՄՀ-ում ուսանողների գնահատման համակարգն ունի լուրջ վերանայման կարիք. այն չի պարունակում դասավանդման և ուսումնառության մեթոդներին համապատասխան ձևաչափեր և ցուցիչներ, ըստ որի, հնարավոր կլիներ գնահատել ուսումնառության ակնկալվող արդյունքներին համապատասխան ձեռքբերվող կարողությունները»:

 

 

Մկրտիչ Ավագյանը հիշեցրեց, որ դեռևս 2012 թվականին Մանկավարժական համալսարանի գիտական խորհուրդը քննարկել և հավանության էր արժանացրել ՀՊՄՀ- ում ուսանողների գիտելիքների ստուգման և գնահատման նոր կարգը, ըստ որի, գնահատումը հիմնվում է առարկայի ելքային արդյունքների վրա և բխում մասնագիտական կրթական ծրագրի, նպատակների և խնդիրների, կոպմիտենցիաների համապատասխանությունից.«Բակալավրիատի և մագիստրատուրայի ուսանողների համար առաջարկվում է կիրառել գիտելիքների գնահատման կիսամյակային համակարգ, որի հիմքում դրվում է կիսամյակի ընթացքում ուսուցանվող առարկաներից գիտելիքի գնահատում կրեդիտային հենքով` ընթացիկ ուսուցողական, միջանկյալ որակական ստուգման և հանրագումարային ամփոփումների տեսքով. վերջնական գնահատումը` կիսամյակի ընթացքում դրսևորած գիտելիքի կուտակային միավորների հիման վրա»:

 

 

Կրթության բարեփոխումների և որակի վարչության պետը մանրամասն ներկայացրեց նաև բուհի Սկզբնական և Հատուկ կրթության ֆակուլտետներում սեպտեմբերից ներդրված գնահատման նոր համակարգի արդյունքների վերաբերյալ ֆոկուս խմբերի հարցման արդյունքները, դրան տեղեկացված լինելու ցուցանիշները, համակարգի թույլ և ուժեղ կողմերը, դասախոսների, դեկանատների և ուսանողների առաջարկները:

 

Բուհի ռեկտոր Ռուբեն Միրզախնյանը կարևորեց գնահատաման նոր կարգի ներդրումը՝ վստահեցնելով, որ համակարգն ունի մի շարք առավելություններ, իսկ միակ բացասական կողմը համարեց համակարգի նորարարական լինելը:

 

Գիտական խորհուրդը միաձայն որոշում ընդունեց ուսանողների գիտելիքների ստուգման և գնահատման նոր կարգը ներդնել ՀՊՄՀ բոլոր ֆակուլտետների 1-ին կուրսերում՝ 2014-15 ուսումնական տարեսկզբից:

 

 

 

Ընթացիկ հարցերում Աշխատակազմի և միջազգային համագործակցության գծով պրոռեկտոր Արա Երեմյանը զեկուցեց և գիտական խորհրդի հաստատմանը ներկայացրեց Համալսարանի Գրադարանի, Պատմության թանգարանի, Հոգեբանության, գիտահետազոտական լաբորատորիայի, Սփյուռք գիտաուսումնական կենտրոնի, Քվանտային էլեկտրոնիկայի և ինտեգրալային օպտիկայի լաբորատորիայի կանոնադրությունները:

 

Ուսումնամեթոդական վարչության պետ Մհեր Մելիք-Բախշյանի զեկուցման արդյունքում Գիտխորհուրդը հաստատեց Համալսարանի Տնտեսագիտության և նրա դասավանդման մեթոդիակայի ամբիոնի վերանվանման հարցը՝ այն վերափոխելով Տնտեսագիտության և կառավարման:

 

Օտար լեզուների դասավանդման մեթոդիկայի ամբիոնի վարիչ Մելանյա Աստվածատրյանն էլ ներկայացրեց «Մանկավարժական կրթության զարգացման հայեցակարգ»-ում համալսարանի մի շարք ամբիոնների և ֆակուլտետների աշխատանքային խմբի կողմից արված առաջարկներն ու դրանց հիման վրա կատարված փոփոխություններն ու լրացումները:

 

Գիտխորհրդի ընթացքում փակ քվերակության արդյունքում պրոֆեսորադասախոսական կազմի թափուր պաշտոնների ներկայացված թեկնածուներից Լևոն Արաբաջյանը ընտրվեց Մաթեմատիկայի անալիզի և ֆունկցիաների տեսության, իսկ Վլադիմիր Պետրոսյանն ուՎանիկ Վիրաբյանը ՝Հայոց պատմության ամբոինների պրոֆեսորներ:

 

Գիտական կոչումների ներկայացված թեկնածուներից 4-ը ստացան պրոֆեսորի, 3-ը՝ դոցենտի կոչումներ:

 

Նիստի ավարտին Ուսումնագիտական գծով պրոռեկտոր Սրբուհի Գևորգյանը Գիտական խորհրդի անդամների հաստատմանը ներկայացրեց թեկնածուական ատենախոսություններն ու տպագրության հավակնող ձեռնարկները: