Երիտասարդ գիտնական, պատմական գիտությունների թեկնածու, Հայոց պատմության ամբիոնի դոցենտ Սամվել Պողոսյանը Լեհաստանի Գդանսկ քաղաքում սեպտեմբերի 20-21-ը մասնակցել է «Համերաշխություն, ինքնություն, հիշողություն» թեմայով գիտաժողովին:
Գիտաժողովին մասնակցել է ավելի քան 120 հոգի` բոլոր աշխարհամասերից:
Հայաստանի միակ ներկայացուցիչը պատմության մասնաճյուղում ներկայացրել է «ԱՄՆ-ի հայկական կազմակերպությունների համագործակցությունը և կամավորական շարժումը առաջին համաշխարհային պատերազմի ժամանակ» թեմայով զեկույցը:
Թեմայի շրջանակում անդրադարձ է եղել ամերիկահայ 7 կազմակերպություններին, որոնք պառակտված էին և միավորվեցին առաջին համաշխարհային պատերազմի ժամանակ միայն, երբ անհրաժեշտություն կար ստեղծել կամավորական շարժում:
«Զուգահեռներ տանելով այսօրվա հետ`փորձեցի վեր հանել ներհամայնքային համագործակցության խնդիրները, և թե ինչպես են հայերը կարողանում համագործակցել և համախմբվել ազգային խնդիրների շուրջ: Թեման հետաքրքրեց շատերին. ծավալվեց բուռն քննարկում»,-armspu.am-ի հետ զրույցում նշեց Սամվել Պողոսյանը:
Գիտաժողովում արծարծվել է նաև հայոց ցեղասպանության հարցը: Մասնակից թուրք ներկայացուցիչներն ամեն ինչ արել են պատմությունը կեղծելու, անցյալը մոռացության տալու համար: Հայ ու մասնակից այլազգի պատմաբանների միջամտությամբ այդ փորձերը կանխվել են:
Հայաստանի ներկայացուցչին` Սամվել Պողոսյանին, ֆինանսական միջոցներ են տրամադրել ՀՀ նախագահի` երիտասարդ գիտնականներին հատկացրած դրամաշնորհից և համալսարանից:
«Մասնակցությունը գիտաժողովին հնարավորություն տվեց հասկանալ, որ մենք եւս կազմակերպչական առումով չենք զիջում լեհերին: Դրա վառ ապացույցը անցյալ տարի երիտասարդ պատմաբանների նախաձեռնող խմբի հետ կազմակերպած «Երիտասարդ պատմաբանների միջազգային գիտաժողովն էր»,-հավելեց պատմաբանը:
Նշենք, որ Գդանսկի և Պարանայի պետական համալսարանների կազմակերպած «Համերաշխություն, ինքնություն, հիշողություն» թեմայով գիտաժողովը նվիրված էր 1982 թվականին Լեհաստանում տեղի ունեցած համերաշխության շարժմանը:
