ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Օրերս ՀՊՄՀ-ի   Բանսիրական ֆակուլտետում  «Ընտանեկան կյանքի և սոցիալական հոգեբանություն» դասընթացի շրջանակներում անցկացվեց միջառարկայական սեմինար-քննարկում՝ «Սերը արվեստում և հոգեբանության մեջ» թեմայով:

Ֆակուլտետի Հայոց լեզու և գրականություն բաժնի 2-րդ կուրսի ուսանողները հոգեբանության դասախոս Ասյա Կաթունյանի հետ միասին փորձեցին  ցույց տալ մարդկությանը հուզող սիրո դրսևորումները արվեստում՝ դրանց տալով  գիտական, հոգեբանական բացատրություններ:

Ուսանողները բաժանվել  էին երկու խմբի. «Գիտական խումբը» ուսանողների շրջանում իրականացրել էր հոգեբանական հարցումներ և թեստեր, որոնց արդյունքները համադրվել էին հայտնի տեսությունների դրույթների հետ:

Նրանք ներկայացրին սիրո մասին  գիտական փաստեր, հայտնի հոգեբանների մեկնաբանություններ: «Գեղարվեստական խումբը» ներկայացրեց  գրական ստեղծագործություններից հատվածներ, ընթերցվեցին հայ և ռուս հեղինակների բանաստեղծություններ:

Լսարանը վերածվել էր ուսանողների աշխատանքների պատկերասրահի. հնչում էր դասական երաժշտություն, ուսանողների ելույթներն ուղեկցվում էին թեմային համահունչ  տեսանյութերի ցուցադրությամբ:

Նպատակ ունենալով ցույց տալ սիրո անձնային դրսևորումները՝ ուսանողները կատարեցին սիրո մասին երգեր (Մ․ Հայկանուշը) և հեղինակային բանաստեղծություններ (Պ. Անի):

Սեմինարի շրջանակներում ուսանողները կարողացան տարբերակել  սիրո՝ մարդկային բարձրագույն զգացմունքի առանձնահատկությունները և արվեստում դրա դրսևորման յուրահատկությունները, կատարեցին հետաքրքիր եզրահանգումներ:

«Ուսանողներն աշխատել են ոգևորված և իրենց հավաստմամբ`  կրկին բացահայտել են սերը»-old.aspu.am-ի հետ զրույցում նշեց Ասյա Կաթունյանը, իսկ Բանասիրական ֆակուլտետի դեկանի տեղակալ Սուսաննա  Ղարիբյանն էլ հավելեց՝ նման սեմինարները շատ օգտակար են տարբեր մասնագիտացմամբ սովորող ուսանողների գիտական մտահորիզոնը լայնացնելու տեսանկյունից և  լավ նվեր՝ տարեմուտի շեմին: