- Հայ
- Рус
- Eng
Վերջերս լույս է տեսել գեղարվեստական, պատմամշակութային և փաստագրական մեծածավալ նյութ պարունակող արվեստագիտության թեկնածու, դոցենտ Արա Հակոբյանի «Հայազգի ծովանկարիչները» ուսումնասիրությունը:
Գրքի խմբագիրներ են ՀՀ Մշակույթի վաստակավոր գործիչներ, պրոֆեսորներ Ռուբեն Միրզախանյանն ու Վիգեն Ղազարյանը: Առաջին անգամ փաստական նյութի լայն ընդգրկմամբ հանգամանորեն ներկայացվում է հայազգի ծովանկարիչների և ծովանկարին անդրադարձած արվեստագետների փորձություններով լի, բայց և նշանակալից իրադարձություններով, հիշարժան դեպքերով ու երջանիկ հանդիպումներով հագեցած կենսագրությունը:
Նրանց կտավներում հատկապես կարևորվում են ժանրա-թեմատիկ բովանդակության արտացոլված, ազգային մտածողության, գունային անհատական ընկալումների, տեխնիկական յուրահատուկ կատարումների հետ կապված մի շարք խնդիրներ, որոնք դիտարկվում են նկարիչների վրձնած ծովապատկերների օրինակներով, դրանց մանրախույզ քննությամբ:
Երկարամյա հետազոտությունների և պրպտումների արդյունք հանդիսացող մեծածավալ աշխատությունը էապես խորացնում է ազգային բնանկարի մասին պատկերացումները:
Նյութը դիտարկված ու լուսաբանված է տարբեր կողմերից, պատմամշակութային լայն համատեքստում. գիտական շրջանառության մեջ են դրվել մինչ այժմ անհայտ անուններ, ստեղծագործություններ, բացահայտվել և մատնանշվել են հայ ծովանկարչության առավել բնորոշ ուրույն գծերը:
«Ազգայինի հատկանիշները պետք չէ փնտրել սոսկ սյուժեներում. Գաղտնիքը՝ արվեստագետի խառնվածքի, ստեղծագործական աշխատանքի մեթոդաբանության մեջ է: Արժևորելով յուրաքանչյուրի ներդրումը՝ հարկավոր է նկատի ունենալ, որ նկարչական ոչ մի դպրոց, ոչ մի անհատ նկարիչ չի կարող զարգանալ աշխարհից կտրված, հատկապես 20-րդ դարում վիթխարի չափերի հասած բազմակողմանի առնչությունների պայմաններում»,- նշում է Արա Հակոբյանը:
