ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

«Գլոբալ Բրիջ» կրթահամալիրում այսօր կայացավ ՀՊՄՀ Սկզբնական կրթության ֆակուլտետի ուսանողների ստեղծագործական աշխատանքների ցուցահանդեսի բացումը:

Ձեռնարկը բուհի հիմնադրման 100-ամյակին նվիրված միջոցառումներից է, որի մեկնարկը տրվել էր Գագիկ Ստեփանյանի անվան համար 135 դպրոցում և շարունակվում է մայրաքաղաքի այլ դպրոցներում ևս:

Բուհի ղեկավարությանը, դասախոսական կազմին և ուսանողներին դպրոցում ընդունեցին մեծ ոգևորությամբ.այստեղ ևս դասավանդողներից շատերը նախկին աբովյանականներ են:

Եվս մեկ անգամ կարևորելով բուհ-դպրոց համագործակցությունը՝ Սկզբնական կրթության ֆակուլտետի դեկան Հեղինե Խաչատրյանը ներկայացրեց մեկդարյա տարեգրություն ունեցող Մանկավարժական համալսարանը և ընդգծեց՝ սովորողներին գիտելիք, անձնային որակներ ու արժեքներ փոխանցող ուսուցիչներից շատերը հենց այս կառույցի  շրջանավարտներն են:

«Ցուցադրված աշխատանքների հեղինակների շարքում, գուցե, հանդիպեք նաև ձեր ուսուցիչների ու ծնողների անունները, որոնք ավարտել են Մանկավարժական համալսարանը:   Բուհի հիմնադրմանը  նվիրված այս խորհրդանշական ցուցահանդեսում ներկայացված են  ինչպես ներկայիս ուսանողների, այնպես էլ տարբեր տարիների շրջանավարտների  աշխատանքներ»,- նշեց Սկզբնական կրթության ֆակուլտետի դեկան Հեղինե Խաչատրյանը:

Վերջինս նկատեց՝ ձեռնարկը բուհ-դպրոց կապի լավագույն դրսևորումներից է և հույս հայտնեց, որ ապագայում սովորողներից  ոմանք կընտրեն այն ֆակուլտետը, որի սաների լավագույն աշխատանքներն այսօր զարդարում են  իրենց կրթահամալիրը:

Ի դեպ, այցի ընթացքում ֆակուլտետի «Տարրական մանկավարժություն և մեթոդիկա» մասնագիտության ուսանողներն իրենց պատրաստած Ա տառի թռչնագրերով և ՀՊՄՀ-100 նշումով էջանիշներ նվիրեցին դպրոցականներին. վերջիններս դրանք գունազարդեցին իրենց նախընտրած գույներով՝ պահելով որպես օրվա մասին հիշեցնող գեղեցիկ հուշ:

Մանկավարժական գիտությունների թեկնածու, դոցենտ Ժաննա Խաչատրյանի ուսանողների ստեղծագործական աշխատանքները ցուցահանդեսից  ցուցահանդես համալրվում են նորերով:

Այս անգամ ներկայացված էր 80-ից ավելի՝ տարբեր մեթոդներով արված ծեփակերտ, գեղանկարչական և գծանկարչական, դեկորատիվ աշխատանքներ, որոնք մինչ հաջորդ ցուցահանդեսը կզարդարեն կրթահամալիրը:

Մանկավարժական համալսարանի ուսանողները վստահ են՝ ցուցահանդեսը ծառայում է  իր նպատակին և  օգնում դպրոցականներին ավելի մոտ լինել արվեստին:

ՀՊՄՀ դասախոսները շրջեցին «Գլոբալ Բրիջ» կրթահամալիրում. մանկավարժները, դասավանդողների հետ զրուցեցին կրթության, դպրոցի խնդիրների մասին, քննարկեցին հետագա համագործակցության հնարավորությունները:

Միջոցառումն ուղեկցվեց դպրոցականների գեղարվեստական կատարումներով: