Հայկական պետական մանկավարժական համալսարանի Հունգարիայի լեզվի, պատմության և մշակույթի կենտրոնը հրավիրում է մասնակցելու Հունգարիան և Հայաստանը խորհրդային շրջանում» թեմայով գիտաժողովի, որը տեղի կունենա 2025թ․ հոկտեմբերի 21–22-ը, ՀՊՄՀ-ում։ Այն կանցկացվի անգլերեն, հայերեն, հունգարերեն կամ ռուսերեն (անհրաժեշտության դեպքում կարող է տրամադրվել թարգմանչական աջակցություն)։
Ամփոփագրերի ներկայացման վերջնաժամկետն է 2025թ․ սեպտեմբերի 20-ը, իսկ ընդունման ծանուցում՝ 2025թ․ սեպտեմբերի 30-ը։
Գիտաժողովը նվիրված է խորհրդային ժամանակաշրջանում Հունգարիայի և Հայաստանի բազմազան ու բարդ պատմական փորձառությունների ուսումնասիրությանը։ Այն հնարավորություն է տալիս բակալավրիատի և մագիստրատուրայի ուսանողներին ներկայացնել իրենց հեղինակային հետազոտությունները՝ անդրադառնալով այս երկու երկրների խորհրդային ժամանակաշրջանի ընդհանուր և/կամ փոխկապակցված պատմություններին։
Գիտաժողովն անցկացվում է 1956թ․ հոկտեմբերի 23-ի հունգարական հեղափոխության հիշատակին նվիրված միջոցառումների շրջանակում։ Այն նպատակ ունի խթանել երկխոսությունը ընդհանուր պատմական փորձառությունների շուրջ և ամրապնդել փոխըմբռնումը Հունգարիայի և Հայաստանի միջև՝ գիտական և մշակութային դիտարկումների միջոցով։
Գիտաժողովին ներկայացվող թեմաները ներառում են, բայց չեն սահմանափակվում հետևյալով՝
- Խորհրդայնացման գործընթացները․ քաղաքականություն, կրթություն և մշակույթ
- Պետական հսկողություն, ճնշումներ և քաղաքական վերահսկողություն
- Ազգայնականությունը, ինքնությունը և ընդդիմությունը խորհրդային շրջանում
- Ամենօրյա կյանքն ու սոցիալական փոփոխությունները սոցիալիզմի պայմաններում
- Հիշողության քաղաքականություն և խորհրդային շրջանի ժառանգություն
- Մշակութային և ինտելեկտուալ փոխակերպումները Արևելյան բլոկում
- Կրոնը և ազգային փոքրամասնությունների ինքնությունը սոցիալիստական Հունգարիայում և Հայաստանում
- Երիտասարդական շարժումներ և հասարակական փոփոխություններ
- Հայ-հունգարական հարաբերություններ
Զեկույցների ներկայացման պահանջներն են՝
- Զեկույցի ամփոփագրերը պետք է լինեն 300–400 բառ, ընդգրկեն հետազոտական հարցադրումը, մեթոդաբանությունը և հիմնական թեզերը։
- Զեկույցում պետք է անպայման նշված լինեն դիմողի անունը, կրթական հաստատության անվանումը, ուսման տարին և կոնտակտային տվյալները։
- Զեկույցի ներկայացումը պետք է տևի առավելագույնը 15 րոպե, որից հետո կանցկացվի քննարկում։
- Զեկույցները կարող են գրվել և ներկայացվել անգլերեն, հայերեն, հունգարերեն կամ ռուսերեն։
Գիտաժողովի ավարտին մասնակիցներին կհանձնվեն վկայականներ։
Գիտաժողովին մասնակցելու համար անհրաժեշտ է անցնել հետևյալ հղումով՝
