ԽԱՉԱՏՈՒՐ ԱԲՈՎՅԱՆԻ ԱՆՎԱՆ ՀԱՅԿԱԿԱՆ ՊԵՏԱԿԱՆ ՄԱՆԿԱՎԱՐԺԱԿԱՆ ՀԱՄԱԼՍԱՐԱՆ

Մինեսոտայի համալսարանի փորձագիտական խմբի աշխատանքային այցի շրջանակներում Երևանի ներառական կրթություն իրականացնող 54 դպրոցների ուսուցիչների համար այսօր կազմակերպվել էր վարպետաց դասեր:

Բացման խոսքով հանդես եկավ Երևան քաղաքի քաղաքապետարանի կրթության վարչության պետ Աննա Ստեփանյանը՝ նշելով ուսուցչի կարևորագույն դերը ՀՀ հասարակության մեջ ներառականության խթանման գործընթացում:

Մինեսոտայի համալսարանի պրոֆեսորների և ՀՊՄՀ-ի դասախոսների համադասավանդմամբ ներկայացվեց ներառական կրթության իրականացման համատեղ փորձի մասին:

ՄԱԿ-ի մանկական հիմնադրամի կրթական ծրագրերի բաժնի ղեկավար, կրթության ոլորտի մասնագետ Ալվարդ Պողոսյանն old.aspu.am-ի հետ զրույցում նշեց, որ հանդիպման նպատակն է ներկայացնել այն ռեսուրսները, որոնք մշակվել են երկու տարվա ընթացքում Մինեսոտայի և Մանկավարժական համալսարանի երկամյա համագործակցության և համատեղ աշխատանքի արդյունքում:

Ալվարդ Պողոսյանը լիահույս է, որ ուսուցիչների ակտիվ մասնակցությունը հնարավորություն կտա հայ և ամերիկացի գործընկերներին հետագա ծրագրերում հաշվի առնել նաև ուսուցիչների կարծիքներն ու տեսակետները:

«Պետական պլանով նախատեսված էր 2018 թվականին համատարած անցնել ներառական կրթության, սակայն գործընթացը հետաձգվեց, որպեսզի ուսուցիչներն ավելի պատրաստ մտնեն դպրոց, զինվեն նոր մեթոդներով ու նյութերով և կարողանան աշխատել տարբեր ունակություններով երեխաների հետ»,-նշեց կրթության ոլորտի մասնագետն ու հավելեց, որ այդ գործում մեծապես կնպաստի նաև դասագրքի կիրառումը:

Ուսուցիչների համար կազմակերպվեց 4 դասընթաց, որտեղ համատեղ աշխատելու իրենց մեթոդները ներկայացրին 4 պրոֆեսորներ Մինեսոտայի և 1 դասախոս Մանկավարժական համալսարանից: Ներկայացվեց դասը երկուսով վարելու ձևաչափը, նմանօրինակ դասի առանձնահատկություններն ու նրբությունները, մեթոդի էությունը՝ համատեղ ուսուցման փորձի ցուցադրությամբ:

Ցուցադրվեց նաև ՀՀ-ում ներառական կրթության բարեփոխումների մասին պատմող «Ճանապարհ դեպի ներառականություն» ֆիլմը:

Մանկավարժական համալսարանի և Մինեսոտայի համալսարանի դասախոսները ներառական կրթության իրենց փորձն ու մշակած նոր մեթոդները կներկայացնեն նաև Վանաձորի համալսարանում: