- Հայ
- Рус
- Eng
Այսօր Սկզբնական կրթության ֆակուլտետի 33 ուսանող «Քայլ առ քայլ» բարեգործական հիմնադրամի կողմից ստացավ վկայական՝ դեկտեմբերի 9-10-ը համանուն ծրագրի շրջանակներում վերապատրաստվելու համար:
Բուհը հյուրընկալած հիմնադրամի տնօրեն Ռուզաննա Ծառուկյանն ու Մարինե Մկրտչյանը չթաքցրին՝ ուսանողներից ունեցած ակնկալիքներն արդարացվեցին. մոտիվացիան, ակտիվությունը, շահագրգռվածությունը, հետաքրքրությունը նոր գիտելիքների, սովորելու, լսելու և իմանալու ցանկությունն իրապես արժանի է խրախուսման:
«Սա կազմակերպության կողմից ուսանողների հետ տարվող պիլոտային ծրագիր է՝ մեր և ֆակուլտետի համատեղ որոշումը: ՀՊՄՀ-ն, լինելով մանկավարժական մայր բուհ, առաջին հաստատությունն է, որի հետ համագործակցությունն ընդլայնվեց. մանկավարժներից բացի, վերապատրաստվեցին նաև մագիստրոսները՝ դպրոց մուտք գործելու նախաշեմին կանգնած ուսանողները»,-նշեց Ռուզաննա Ծառուկյանը:
Վերջինս վստահեցրեց՝ ուսանողների կողմից լրացված գնահատման թերթիկը անպատասխան չի մնա. համագործակցությունը շարունակելու համար նախատեսվում են քննարկումներ, որոնք կկառուցեն կրթական կարիքներն ու դրան համապատասխան կուղենշեն գործընկերության ուղղությունները Մանկավարժական համալսարանի հետ.«Բժշկի և ուսուցչի մասնագիտություններն ինձ համար ամենակարևորն են. առաջինին վստահում ենք մեր կյանքը, երկրորդին՝ երեխաներիին, իսկ նրանցից ավելի թանկ բան չկա աշխարհում»:
Վերապատրաստում իրականացրած Մարինե Մկրտչյանն էլ նկատեց՝ հետազոտությունները ցույց են տալիս՝ ամենակարևորը ճիշտ դրված հիմքն է:
Ձեռնարկին ներկա պրոռեկտոր, «Քայլ առ քայլ»-ի վերապատրաստումներին բազմիցս մասնակցած Սրբուհի Գևորգյանը վստահ է՝ ծրագիրը չափազանց հետաքրքիր է և հնարավորություններով լի:
Նախաձեռնությունը կօգնի պրակտիկայում նոր ինովացիոն ծրագրերի, ինտերակտիվ մեթոդների, մանկավարժական գիտելիքների, կարողությունների ներդրմանը.« Ապագա մանկավարժը նախաձեռնության շնորհիվ կարող է ստանալ նաև այն բաղադրիչը, որը որպես վերջնարդյուք կնպաստի գործնական հմտություների ձևավորմանը, որն էլ գերկարևորված կլինի մանկավարժի մասնագիտական գործունեության ողջ ընթացքում»:
Մասնագիտական կրթության և կիրառական մանկավարժության ամբիոնի վարիչ Աիդա Թոփուզյանը վստահ է՝ Սկզբնական կրթության ֆակուլտետը ճիշտ ուղու վրա է. մագիստրատուրայի ուսանողը պետք է տիրապետի ժամանակակից տեխնոլոգիաներին, ունենա համեմատական մտածելակերպ, կարողանա վերլուծել, եզրակացություն անել, իսկ սեմինարն այդ առումով շատ օգտակար է:
Ֆակուլտետի Նախադպրոցական մանկավարժության և մեթոդիկաների ամբիոնի վարիչ Սվետլանա Մարությանն էլ ծրագիրն աննխադեպ համարեց.մագիստրոսներից զատ, վերապատրաստվողների շարքում են նաև բակալավրիատի ավարտական կուրսի այն ուսանողները, ովքեր որոշել են շարունակել մասնագիտական կրթությունը:
Ուսումը աշխատանքի հետ համատեղած մագիստրոս Թամար Անտոնյանը վերապտրաստման օգտակարության գործակիցը բարձր համարեց՝ նկատելով՝ նոր մեթոդները հենց հաջորդ օրվանից ներդրել է իր աշխատանքում:
Մասնագիտական գործունեությունը «Քայլ առ քայլ»-ում սկսած Սկզբնական կրթության ֆակուլտետի դեկան Հեղինե Խաչատրյանը չի թաքցնում՝ հենց նրանց է շնորհակալ ձեռք բերած հմտությունների համար. կազմակարեպության ծրագրերը աքսիոմա են մասնագիտական շրջանականերում.գործում են պրոֆեսիոնալ, հետևողական են. անդրադառնում են կարևորագույնին:
Դեկանը վաղ տարիքի երեխաների զարգացմանն ու կրթությանն առնչվող նոր, ժամանակակից մոտեցումների մշակման ու տարածման անգնահատելի ներդրման, ինչպես նաև ֆակուլտետի հետ արդյունավետ համագործակցության համար շնորհակալագիր և ուսանողների պատրաստած ձեռագործ նվեր հանձնեց «Քայլ առ քայլ» բարեգործական հիմնադրամի ներկայացուցիչներին:
